USAID O‘zbekistonda ta’limni qo‘llab-quvvatlash uchun qo‘shimcha 6,1 mln dollar ajratdi

AQSh Xalqaro taraqqiyot agentligi (USAID) Maktabgacha va maktab ta’limi vazirligi bilan davom etayotgan Rivojlanish maqsadlari bo‘yicha grant shartnomasi (DOAG) doirasida qo‘shimcha moliyalashtirish uchun 6,1 million dollar ajratdi. Shu tariqa DOAG’ga jami investitsiya 47 million dollardan oshdi. Bu haqda AQShning Toshkentdagi elchixonasiga tayanib, “Gazeta.uz” xabar bermoqda.

Yangi mablag‘ boshlang‘ich maktab o‘quvchilarining asosiy ko‘nikmalarini rivojlantirishga yordam beradigan dasturlarni kuchaytiradi va 8−11-sinf o‘quvchilarini ishga joylashish va kelajak iqtisodiyotida ishtirok etish uchun zaruriy tadbirkorlik va iqtisodiy ko‘nikmalar bilan ta’minlaydi, deyiladi xabarda.

Besh yillik DOAG shartnomasi 2019-yilda imzolangan. USAID’ning O’zbekiston ta’lim sohasiga kiritgan sarmoyalari boshlang‘ich sinflarda o‘qish va matematika ko‘nikmalarini oshirish, ingliz tilida erkin muloqot qilishni yaxshilash, axborot va kommunikatsiya texnologiyalari ko‘nikmalarini rivojlantirish va ishga joylashish ko‘nikmalarini shakllantirishga qaratilgan.

«Ta’limga sarmoya kiritish — bu har kim uchun porloq kelajakka sarmoya kiritishdir, — dedi USAID’ning O‘zbekistondagi missiyasi direktori Devid Hofman. — Sifatli ta’lim berish orqali biz nafaqat bolalarni zarur ko‘nikmalar va bilimlar bilan ta’minlaymiz, balki yanada farovon, teng va barqaror jamiyatga yo‘l ochamiz. Ta’limga sarflangan har bir dollar — bu barchamiz uchun yaxshiroq kelajakni qurishga qaratilgan qadamdir».