WADA taqiqlangan moddalar ro‘yxatini yangiladi

Butunjahon antidoping agentligi (WADA) sportda taqiqlangan moddalarning yangilangan ro‘yxatini e’lon qildi. Bu haqida O’zbekiston Dzyudo Federatsiyasi xabar bermoqda.

O‘zgarishlar WADA Ijroiya qo‘mitasining navbatdagi yig‘ilishida ma’qullandi va 2025 yilning 1 yanvar kunidan mazkur taqiq kuchga kirishini ta’kidladi.

Xususan, “ksipamid” taqiqlangan diuretiklar va maskalanuvchi vositalar qatoriga kiritilgan bo‘lsa, “midodrin” va “tezofenzin” stimulyator sifatida tasniflandi.

Shuningdek, “guanfatsin” esa taqiqlangan moddalardan chiqarib tashlanadi. “Elacyestrant” antiestrogenik modda sifatida gormonal va metabolik modulyatorlar ro‘yxatidan o‘rin oldi.

Shu jumladan, qon topshirish (aferez usuli) va uning tarkibiy qismlari, shu jumladan plazma, eritrotsitlar, leykotsitlar, trombotsitlar va periferik qon ildiz hujayralari endi taqiqlanmaydi. Biroq, buning uchun ular maxsus akkreditatsiyalangan donorlik markazida o‘tkazilgan bo‘lishi lozim.

Taqiqlangan moddalarning yangilangan ro‘yxatini www.wada-ama.org sayti orqali to‘liq bilib olishingiz mumkin.