Xakerlar jurnalist Shuhrat Latipovning Telegram akkauntini buzib kirishdi

Gazeta.uz nashri jurnalisti Shuhrat Latipov 28-sentabr kuni ertalab soat 4:23 va 4:24 da uning shaxsiy Telegram akkaunti buzib kirilgani haqida xabar berdi.

Uning so‘zlariga ko‘ra, hodisaga iyun oyi oxirida ikki faktorli autentifikatsiyaning o‘chirilishi sabab bo‘lgan.

“Men uzoq vaqt davomida xavfsizlik sozlamalarimni tekshirmadim va katta xatoga yo’l qo’ydim”, deb tan oldi jurnalist.

Xakerlik hujumlari Lyuksemburg va Turkiyadagi IP manzillardan qayd etilgan, biroq Latipov ularning ortida mahalliy mutaxassislar turgan bo‘lishi mumkinligini taxmin qilmoqda. Uning qayd etishicha, xakerlik urinishidan bir necha daqiqa oldin unga mahalliy raqamdan qo‘ng‘iroq bo‘lgan.

“Yaxshiyamki, Telegram qoidalariga ko‘ra, siz o‘z akkauntingizni darhol o‘chira olmaysiz. Bu menga profilim ustidan nazoratni tiklashimga vaqt berdi”, — dedi Shuhrat Latipov.

Jurnalist o‘z o‘quvchilari va hamkasblarini raqamli gigiena qoidalariga rioya qilish, ijtimoiy tarmoqlar va messenjerlardagi akkauntlarining xavfsizlik sozlamalarini muntazam tekshirib turish zarurligi haqida ogohlantirdi.

Latipov shaxsiy ma’lumotlar va yozishmalar sizib chiqishi mumkinligidan xavotir bildirdi.

Telegram’da ikki faktorli autentifikatsiyani yoqish uchun quyidagi amallarni bajaring:

• Telegram ilovasini oching va Sozlamalarga o’ting.
• “Maxfiylik va xavfsizlik” bo’limini tanlang.
• “Ikki faktorli autentifikatsiya” ga o’ting va ustiga bosing.
• “Enable” tugmasini bosing.
• Foydalanmoqchi bo’lgan parolni kiriting va uni tasdiqlang.
• Agar so’ralsa, kirishni tiklash uchun elektron pochta manzilini qo’shing.
• O’zgartirishlaringizni saqlang.

Hisobingiz endi qo’shimcha xavfsizlik darajasi bilan himoyalanadi.