Xorazm viloyatida fuqaro o‘z uyida sherni noqonuniy saqlagani aniqlandi

Xorazm viloyatida sherni noqonuniy uyda saqlash holati aniqlandi. Ekologiya vazirligi matbuot xizmatining xabariga ko‘ra, Urganch shahrining Ashxobod mahallasida yashovchi fuqaroning uyida o‘tkazilgan tezkor reyd davomida qafasda saqlanayotgan yosh yovvoyi sher topilgan.

Huquqbuzarga nisbatan 92-modda (Hayvonlarning yashash muhitini muhofaza qilish qoidalarini, zoologik va botanika kollektsiyalarini yaratish hamda ular bilan savdo qilish qoidalarini buzish, shuningdek hayvonlarni ruxsatsiz boshqa joyga ko‘chirish, iqlimlashtirish yoki kesib o‘tish) bo‘yicha ma’muriy bayonnoma tuzildi.

Unga 5 BHM miqdorida jarima belgilandi, bu 1 million 700 ming so‘mga yaqin mablag‘ni tashkil qiladi.

Ayni paytda sher Qoraqalpog‘istondagi Nukus hayvonot bog‘iga vaqtinchalik joylashtirilgan. Shuningdek, yirtqichning qachon va qaerdan olinganini aniqlash bo‘yicha tergov ishlari olib borilmoqda.