AQSh Shimoliy Koreyaning Ukrainaga qarshi urushga kirishini to‘xtatish uchun Xitoy bilan muzokaralarni boshladi

Amerika rahbariyati Shimoliy Koreya harbiylarining Ukrainadagi jangovar harakatlardagi ishtirokiga ta’sir o‘tkazish maqsadida Xitoy bilan faol muzokaralar olib bormoqda. Bu haqda AQSh rasmiylaridagi manbalarga tayanib, New York Times yozadi. Muzokaralar faktini AQSh Davlat kotibi Entoni Blinken tasdiqladi.

29-oktyabr, seshanba kuni amerikalik yuqori martabali amaldorlar Vashingtonda xitoylik diplomatlar bilan muzokaralar o‘tkazdi, deya xabar bergan nashrga manba. Qo‘shma Shtatlar Xitoydan hech bo‘lmaganda Kim Chen Inga xabar yetkazishini va maksimal darajada Shimoliy Koreya qo‘shinlarini frontga joylashtirishni cheklashi yoki to‘xtata olishini kutmoqda.

AQSh hukumatining fikricha, Xitoy KXDR va Rossiya o‘rtasidagi ittifoqning tez mustahkamlanib borayotganidan norozi, buning natijasida u Pxenyan ustidan o‘z ta’sirini yo‘qotmoqda. Bundan tashqari, Xitoy Tayvan va Koreya yarimorolidagi vaziyatga Yevropaning ortiqcha e’tiborini qaratishini istamaydi, deydi New York Times  gazetasiga intervyu bergan tahlilchilar.

AQSh prezidentining milliy xavfsizlik bo‘yicha maslahatchisi Jeyk Sallivan AQShning barcha departamentlarini xitoylik hamkasblarini yuzaga kelishi mumkin bo‘lgan oqibatlar haqida ogohlantirishga chaqirdi, deydi AQSh rasmiylaridan biri New York Times  nashriga.

Pentagon ma’lumotlariga ko‘ra, Shimoliy Koreya Rossiyaga 10 mingga yaqin harbiy xizmatchini jo‘natgan, ular hozir tayyorgarlikdan o‘tmoqda va “bir necha hafta ichida” Ukrainaga qarshi urushga jo‘natiladi. Rossiyadagi KXDR kontingenti Janubiy Koreyaga bostirib kirishga tayyorgarlik ko‘rayotgan elita bo‘ron korpusini o‘z ichiga oladi.

Bir kun avval Ukrainaning BMTdagi doimiy vakili Rossiyada Shimoliy Koreyaning 500 ga yaqin zobiti va uch generali borligini aytgandi. Ulardan biri KXDR bo‘linmalariga qo‘mondonlik qiladi, deb xabar beradi Janubiy Koreya razvedkasi.