Buyuk Britaniya va Latviya UQK uchun minglab FPV-dronlar yetkazib berish bo‘yicha tender e’lon qildi

Buyuk Britaniya harbiy idorasi o‘z bayonotida, tanlovdan maqsad “g‘arb sanoati imkoniyatlaridan foydalangan holda katta miqyosda va arzon narxda dronlarni ishlab chiqara oladigan” yetkazib beruvchilarni topishdan iborat ekanligini aytadi.

Buyuk Britaniya Mudofaa vazirligi Ramshtayn formatida Ukrainaga harbiy yordam ko‘rsatishni muvofiqlashtiruvchi 50 dan ortiq davlatlar birlashmasiga murojaatida shunday degan: “Ushbu tender Ukraina mudofaa masalalari bo‘yicha Aloqa guruhiga kiruvchi har qanday mamlakat ishlab chiqaruvchilari uchun ochiq”.

Tender 28-iyunga qadar davom etadi, shundan so‘ng Buyuk Britaniya va Latviya boshchiligidagi “Dron koalitsiyasi” mamlakatlari vakillari eng muvaffaqiyatli kompaniyalarni saralab oladi.

Buyuk Britaniya Mudofaa vazirligi 2024-yil davomida, birinchi tajribani hisobga olgan holda, boshqa shunga o‘xshash tenderlarni ham e’lon qilmoqchi.