Dunyo bo’ylab aeroportlar, banklar va kompaniyalar Windows ishlamay qolganligi sababli texnik muammolar yuzaga kelgani haqida xabar berishdi

Turli mamlakatlardagi aviakompaniyalar, teleradiokompaniyalar va banklar Windows qurilmalari ishlamay qolgani sababli operatsion muammolar haqida xabar berishdi. Bu haqda BBC News va The Guardian yozmoqda. The Verge ta’kidlaganidek, Windows kompyuterlari foydalanuvchilarga “ko’k ekran muammosi”ni ko’rsatgan.

Muammolar AQSh, Buyuk Britaniya, Hindiston, Yangi Zelandiya va Avstraliyada va boshqalarda qayd etilgan. The Verge xabar berishicha, muammolar CrowdStrike kiberxavfsizlik kompaniyasi yangilanishi bilan bog‘liq. Kompaniya muammoni aniqlaganini va noto’g’ri yangilanishni bekor qilganini aytdi. The Verge ta’kidlashicha, bu “allaqachon zarar ko’rgan qurilmalarga yordam bermaydi”.

Amerikaning yirik aviakompaniyalari, jumladan “Delta”, “United” va “American Airlines” aviakompaniyalari aloqa muammolari tufayli parvozlarni to‘xtatdi, deb xabar bermoqda CNN.

Berlin aeroporti “texnik nosozliklar tufayli reyslarni ro‘yxatdan o‘tkazish kechikishi”ni aytdi. Melburn aeroporti yo’lovchilarni “ba’zi aviakompaniyalar uchun ro’yxatdan o’tish jarayoniga ta’sir etuvchi global texnologiya muammosi” haqida ogohlantirdi va yo’lovchilarga “ro’yxatdan o’tish uchun biroz qo’shimcha vaqt ajratishni” tavsiya qildi.

Ryanair yo‘lovchilarga uchishdan kamida uch soat oldin aeroportlarga kelishni maslahat berdi.

“Biz hozirda bizning nazoratimizdan tashqarida bo‘lgan uchinchi tomon IT tizimlarining global nosozligi tufayli tarmoq muammolariga duch kelyapmiz. Biz barcha yoʻlovchilarga aeroportga belgilangan joʻnash vaqtidan kamida uch soat oldin yetib kelishlarini maslahat beramiz”, — deyiladi aviatashuvchi bayonotida.

Britaniyaning Sky News telekanali texnik nosozliklar tufayli efirini to‘xtatgan. Avvalroq kompaniya ertalabki translyatsiyani amalga oshira olmaganini ma`lum qilgandi.