Twitter’ning narxi uni Ilon Mask sotib olganidan buyon to‘rt marta pasaygan

Dunyodagi eng yirik investitsiyaviy xoldinglardan biri — Amerikaning Fidelity kompaniyasi o‘zining X (sobiq Twitter) kompaniyasidagi ulushini 4,19 million dollarga baholadi. Bu haqda Fidelity’ning hisobotiga tayanib, TechCrunch nashri yozmoqda.

Dastlab kompaniya X’ga 19,66 million dollar investitsiya kiritgan. Ya’ni, Fidelity hisob-kitoblariga ko‘ra, uning ulushi 4,6 marta yoki 78 foizga arzonlashgan.

“Bu shuni bildiradiki, Fidelity hozir X kompaniyasi qiymatini 9,4 milliard dollarga baholamoqda”, — deb yozadi TechCrunch.

Uning ma’lumotlariga ko‘ra, Fidelity X platformasining qiymati 44 milliard dollarga baholanayotgan vaqtda unga sarmoya kiritgan, 2022-yil kuzida Ilon Mask uni aynan shunday narxga sotib olgan edi.