“Grinpis”: Ukraina energetika tizimining yo‘q qilinishi Chernobil ofatidan yomonroq avariyalarga olib kelishi mumkin

“Grinpis Ukraina” tomonidan olib borilgan yangi tadqiqotda Ukraina energetika tarmog‘i Rossiya hujumlari natijasida qanchalik zaif va himoyasiz bo‘lib qolgani va hozirda misli ko‘rilmagan yadroviy falokat xavfi yuqori ekanligi aytiladi.

Tashkilotning ta’kidlashicha, energetika tizimiga qarshi hujumlarning davom etishi Rovno, Xmelnitskiy va Janubiy Ukraina AESlari reaktorlarining sovutish tizimlari elektr ta’minotidan uzilishiga olib kelishi mumkin. Ularning haddan tashqari qizishi yadro yoqilg‘isining erishi va radiatsiya chiqishiga olib keladi.

Hisobotda aytilishicha, atom elektr stantsiyasida avariya yuz bergan taqdirda, birinchi bo‘lib Ukraina aholisi jabr ko‘radi, biroq radioaktiv ifloslanish Yevropaning katta qismiga jiddiy ta’sir ko‘rsatishi mumkin. Tashkilotning fikricha, salbiy stsenariyda oqibatlar Fukusima va Chernobil AESlaridagi ofatlardan ko‘ra jiddiyroq bo‘lishi mumkin.

“Hozir MAGATE qat’iyroq harakat qilishi kerak – Rossiya hukumati bilan aniq aloqada bo‘lishi va zudlik bilan muhim kichik stantsiyalarga kengaytirilgan missiyani joylashtirishi kerak”, – deydi “Grinpis”ning Kievdagi vakolatxonasining yadroviy eksperti Shon Berni.