Ilhom Aliyev va Donald Tramp telefon orqali gaplashdi

25-noyabr kuni Ozarbayjon prezidenti Ilhom Aliyev AQSh prezidenti Donald Trampga qo‘ng‘iroq qilib, uni davlat rahbari etib qayta saylangani bilan tabrikladi.

Suhbat chogʻida Aliyev Trampning saylovlardagi ishonchli gʻalabasi Amerika xalqining uning siyosatiga boʻlgan qoʻllab-quvvatlashi va ishonchini aks ettirishini taʼkidladi. U Trampning ikkinchi muddatdagi faoliyati global xavfsizlikni mustahkamlashga yordam berishiga ishonch bildirdi.

Aliyev, shuningdek, Trampning birinchi prezidentlik davrida Ozarbayjon va AQSh oʻrtasidagi doʻstlik va hamkorlikni mustahkamlash borasidagi saʼy-harakatlari muhimligini qayd etdi. U ikki tomonlama munosabatlarni rivojlantirish uchun faol hamkorlik davom etishiga umid bildirdi.

Bunga javoban Tramp Aliyevga samimiy so‘zlari uchun minnatdorchilik bildirdi va ikki davlat o‘rtasidagi hamkorlikni mustahkamlashda birgalikdagi sa’y-harakatlar muhimligini qayd etdi.