Litva markaziy osiyolik muhojirlar soni keskin o‘sayotganidan xavotirda

So‘nggi uch yil ichida Litvaga kirib kelayotgan Markaziy Osiyo fuqarolari soni 14 marta oshdi, bu esa hukumatda xavotir uyg‘otmoqda, ayniqsa, ehtimoliy radikalizm xavflari nuqtayi nazaridan. Bu haqda mamlakat Davlat xavfsizligi departamenti rahbari Daryus Yaunishkis ma’lum qildi.

Uning ta’kidlashicha, muhojirlar oqimining oshishi barcha kirib keluvchilarni tekshirish jarayonini qiyinlashtiradi, bu esa xavfsizlik uchun tahdidlar yaratmoqda. Hozircha bevosita tahdidlar bo‘lmasa-da, Yaunishkis radikallashuv tendensiyasiga e’tibor qaratdi.

Litva bosh vaziri Ingrida Shimonite vahimaga tushmaslikka chaqirdi va Markaziy Osiyodan kelgan muhojirlarning umumiy soni kichik bo‘lib qolayotganini qayd etdi. Uning qo‘shimcha qilishicha, 2025-yildan uchinchi mamlakatlardan keladigan ishchilar uchun kvotalar joriy etiladi, bu muhojirlar oqimini yaxshiroq nazorat qilishda yordam beradi.

2024-yil 1-oktabr holatiga, Litvada qariyb 10,6 ming O‘zbekiston va 7,2 ming Tojikiston fuqarolari istiqomat qiladi, bu ko‘rsatkich avvalgi yillardan sezilarli darajada ko‘p.