Lukashenko Kurskda amaliyot boshlanganidan beri ilk bor Ukrainadagi urush bo‘yicha tinch muzokaralarga chaqirdi

Aleksandr Lukashenko Ukraina Qurolli kuchlarining Kursk oblastida amaliyoti boshlanganidan beri birinchi marta Ukrainadagi urush bo‘yicha tinch muzokaralar o‘tkazishga chaqirdi. Bu haqda u “Rossiya” telekanaliga bergan intervyusida ma’lum qildi. Lukashenkoning matbuot xizmati undan parchani e’lon qildi.

“Keling, muzokaralar stoliga o‘tirib, bu kurashni yakunlaylik. Bu na ukrain xalqiga, na belaruslarga, na ruslarga kerak. Bu ularga [NATO davlatlari] kerak”, – dedi u.

Ushbu chaqiriqdan oldin yadroviy qurollar bo‘yicha keng ko‘lamli muloqot bo‘lib o‘tgandi. Unda Lukashenko, agar NATO Belarus hududiga bostirib kirsa, “eng qizil tugma”ni bosishga tayyorligini aytdi.

“Biz eskalatsiyani istamaymiz va butun NATOga qarshi urushni xohlamaymiz. Biz buni xohlamaymiz. Lekin bunga rozi bo‘lishsa, mayli… Boshqa choramiz qolmaydi. Va “qizil chiziqlar” bo‘lmaydi. U mavjud, bu chiziq davlat chegarasi. Bosishlari bilan (men chegarachi sifatida gapiryapman), javob darhol bo‘ladi”, – dedi u.

Uning fikricha, bunga yo‘l qo‘ymaslik uchun Ukrainadagi urush tomonlari muzokara stoliga o‘tirishi kerak.

2023-yil may oyida Rossiya Belarusda taktik yadro qurolini joylashtirishi ma’lum bo‘lgandi. Shu yilning may oyida Rossiya va Belarus taktik yadro qurollari bilan mashg‘ulotlar o‘tkazdi.

Taktik yadro qurollari (TYaQ) jonli kuchlar kontsentratsiyasini yo‘q qilish uchun mo‘ljallangan. Strategik qurollar oldingi chiziqdan ancha orqada joylashgan harbiy bazalar, omborlar va boshqa nishonlarni yo‘q qilishga mo‘ljallangan.

Lukashenko Ukrainadagi urush bo‘yicha tinch muzokaralar o‘tkazishga birinchi marta chaqirayotgani yo‘q.  Ilgari u bu haqda 2024-yil aprelida, shuningdek, 2023-yil oktyabrida gapirgan edi. Ammo bu Ukraina Qurolli kuchlarining Kursk oblastiga hujumi boshlanganidan beri birinchi shunday chaqiriq. Putin, aksincha, Ukraina kuchlari Rossiya hududida operatsiya boshlaganidan keyin tinchlik muzokaralari imkonsiz bo‘lib qolganini aytdi.