Milliy majlisni tarqatib yuborish: Makronning xavfli qadami yoki uzoqni ko‘zlagan strategiyasi

Emmanyuel Makron o‘z partiyasining Yevropa Parlamentiga o‘tgan saylovlardagi mag‘lubiyatidan so‘ng Milliy majlisni tarqatib yuborish haqidagi qarori Fransiyadagina emas, balki boshqa joylarda ham “tarixiy” va “tamoman kutilmagan” deb atalmoqda. Tahlilchilar frantsiyalik yetakchining qanday taktika bilan yo‘l tutayotganini tushunishga harakat qilmoqda.

Sofiya Xatsenkova, Euronews muxbiri: “Emmanyuel Makronning yakshanba kuni Milliy majlisni, ya’ni parlamentning quyi palatasini tarqatib yuborish haqidagi qarori Frantsiyada va umuman Yevropa Ittifoqida hayrat uyg‘otdi. Makron uchun bu juda xavfli qadam edi”.

Eslatib o‘tamiz, uning partiyasi 2022-yilgi so‘nggi saylovlarda parlamentdagi ko‘pchilikni yo‘qotgan edi. Shuning uchun 30-iyun va 7-iyul kunlariga belgilangan navbatdagi saylovlar prezident uchun yanada katta yo‘qotishlarga olib kelishi mumkin. Bundan tashqari, yakshanbaga o‘tgan Yevropa Ittifoqiga saylovlarda g‘oliblikka erishgan ultra o‘ngparast “Milliy birlashma” partiyasi yetakchisi Jordan Bardela Fransiyaning yangi bosh vaziri bo‘lishi mumkin.

Natijada “birgalikda mavjudlik davri” boshlanishi mumkin (davlat va hukumat rahbarlari turli siyosiy birlashmalarni taqdim qiladi).

Ba’zi tahlilchilarning fikricha, Makron an’anaviy o‘ngparast “Respublikachilar” (LR) partiyasini o‘z liberal koalitsiyasiga qo‘shilishga undash maqsadida shunday qadamga borgan.

Boshqalar Makron makiavel taktikasini qo‘llayotgan, deb hisoblaydi: prezident balki ultra o‘ngparastlar hokimiyatga kelgach, 2027 yilgi prezidentlik saylovlaridan oldin ommaviy norozilikka duch kelishlarini umid qilmoqda. Haqiqatan ham, Makron bu saylovlarni frantsuzlarga muhim masala sifatida taqdim etdi: “Sizlar haqiqatdanam mamlakatni ultra o‘ngparast hukumat boshqarishini istaysizlarmi?”