Oq uy: Ukraina NATOga a’zo bo‘lishi uchun urushda g‘alaba qozonishi kerak

AQSh prezidenti ma’muriyati Ukraina Shimoliy Atlantika alyansiga qo‘shilishi uchun Rossiya unga qarshi olib borayotgan urushda g‘alaba qozonishi kerakligini aytdi. Bu haqda Oq uy Milliy xavfsizlik kengashining strategik aloqalar bo‘yicha koordinatori Jon Kirbi brifingda ma’lum qildi, deb yozadi “Yevropeyskaya pravda”.

U AQSh prezidenti Jo Baydenning NATO Ukrainaning kelajagi, alyansga a’zo bo‘lish uchun barcha a’zo davlatlar bajarishi kerak bo‘lgan ko‘p ishlarni qilishi kerakligi haqidagi so‘zlarini esladi.

“NATO va Qo‘shma Shtatlar Ukraina bu urushda (NATOga a’zo bo‘lish uchun) birinchi navbatda g‘alaba qozonishi kerakligini aytgandi va biz Ukraina buni amalga oshirishi uchun qo‘limizdan kelganini qilmoqdamiz”, – dedi Kirbi.

Oq uy vakili, shuningdek, har qanday holatda ham, urush tugaganidan keyin Ukraina Rossiya Federatsiyasi bilan uzun chegaraga ega bo‘lishini va “Ukraina xalqi uchun xavfsizlikka tahdid” bo‘lishini ta’kidladi.

“Aynan shuning uchun prezident (Bayden) G7 yig‘ilishida ikki tomonlama xavfsizlik shartnomasini imzoladi… toki uzoq vaqt davomida Ukraina harbiy-mudofaa majmuasi o‘zini himoya qilishi uchun zarur bo‘lgan hamma narsaga ega bo‘lishi mumkin bo‘lsin. Bunga Qo‘shma Shtatlarning  yordami ham kiradi”, — dedi Kirbi.

U, shuningdek, Vashington Ukrainaning NATOga kirishiga erishish uchun har qadamda Kiyev bilan hamkorlik qilishini qo‘shimcha qildi.