Orban Rossiya va Xitoy rahbarlari 2024 yil oxirigacha Rossiya va Ukraina o‘rtasida tinch muzokaralarni kutayotganini bildirdi — El País

Viktor Orban iyul oyi boshida Rossiya va Xitoyga qilgan tashriflari haqida Yevropa Ittifoqiga hisobot berdi. Bu haqda Ispaniya nashri Vengriya bosh vaziri Yevropa kengashi rahbari Sharl Mishel va YeI davlatlari rahbarlariga yuborgan maxfiy ma’ruzalarga tayanib yozadi.

Orbanning ta’kidlashicha, Rossiya prezidenti Vladimir Putin va Xitoy rahbari Si Szinpin “Rossiya va Ukraina o‘rtasida yangi tinchlik muzokaralari yil oxirigacha bo‘lib o‘tadi, deb taxmin qilishmoqda”, deb yozadi nashr.

“Suhbatlarimga asoslanib, hozirda o‘t ochishni to‘xtatish bo‘yicha barcha ehtimoliy takliflar va tinchlik muzokaralari bo‘yicha yo‘l xaritasi ijobiy qabul qilinishiga katta imkoniyat borligiga ishonaman”, – deydi Orban Moskvaga safari haqidagi hisobotida. Vengriya Bosh vazirining fikricha, Yevropa AQShni kutmasdan tinchlik tashabbusini “boshlashi” kerak.

Orban Xitoy rahbari bilan AQShdagi prezidentlik saylovlaridan keyin saylangan davlat rahbari “vazifaga kirishishdan oldin ham tezda siyosiy natijaga erishish uchun bosimga duch kelishini” muhokama qildi.

Vengriya bosh vaziri, shuningdek, Si Szinpinga “tinchlik muzokaralari oldidan o‘t ochishni to‘xtatish, shuningdek, tezkor va jadal tinchlik muzokaralari yangi ma’muriyat manfaatlariga mos kelishi mumkinligini” aytdi. Orbanning so‘zlariga ko‘ra, Xitoy rahbari “bunday ssenariy yuzaga kelishi mumkinligi haqida izoh bermagan”.

Orban Yevropa Ittifoqi rahbarlarini Rossiya va Ukraina o‘rtasidagi muzokaralarda o‘zini “halol vositachi” deb hisoblagan Si Szinpin bilan muloqotni boshlashga chaqirdi. U Qo‘shma Shtatlar va Yevropaning siyosatini “urush siyosati” deb atadi, bunda Yevropa “avtomat ravishda Amerika chizig‘iga ergashadi”.