Pavel Durov so‘roq paytida Fransiya maxsus xizmatlari – Libération bilan hamkorlik haqida gapirdi

Durov Parijda hibsga olinganidan so‘ng darhol Fransiya Ichki xavfsizlik Bosh boshqarmasi (DGSI) bilan hamkorlik qilishini ma’lum qildi, deb yozadi Fransiyaning Libération nashri. Shuningdek, ishning boshqa tafsilotlari ham oshkor bo‘ldi.

Firibgarlikka qarshi kurash milliy byurosi (ONAF) binosida bo‘lganida Durov telefon va unga kirish kodini topshirdi. Bu haqda nashrga tergovga yaqin manba ma’lum qildi.

Durov hibsga olingani sababini bilib hayratda qoldi, deb yozadi Libération. Ayni paytda uning Dubaydagi jamoasi huquq-tartibot organlarining so‘rovlariga, jumladan, terrorizm va bolalarga qarshi jinoyatlarga oid barcha Telegram javoblarini topishga harakat qilgan. So’roq paytida Durov barcha so’rovlarga javob berishning iloji yo’qligini aytdi – kompaniya “millionlab” bunday so’rovlarni oladi va sun’iy intellekt ularni birlamchi saralashda ishtirok etadi.

Telegram asoschisi Fransiyaning Ichki xavfsizlik bosh boshqarmasi (DGSI) bilan rasmiy aloqa kanalini ochganini aytdi. Durov, shuningdek, DGSI agentlarining Dubayga tashrif buyurishini e’lon qildi, dedi nashrga tergovga yaqin manba.

Durovning soʻzlariga koʻra, Fransiya rasmiylari ushbu kanal orqali maʼlumot almashish natijasida bir nechta teraktlarning oldini olishga muvaffaq boʻlgan. Telegram rahbarining Fransiya razvedka xizmatlari bilan hamkorlik qilish haqidagi bayonoti ham avvalroq Le Parisien tomonidan keltirildi. Shu bilan birga, 2013-yildan 2024-yilgacha Fransiya politsiyasi Telegram’dan 2460 ta so‘rovga javob olmagan, deya ta’kidlaydi Libération.

Nashrning yozishicha, hibsga olinganidan so‘ng Durov huquq-tartibot idoralari xodimlaridan Telegram asoschisi va Emmanuel Makronning “umumiy do‘sti” bo‘lgan milliarder Ksavye Nil bilan bog‘lanishni so‘ragan. Ilgari ushbu so’rov haqidagi ma’lumotlar AFP agentligi va BFMTV nashrida ham paydo bo’lgan. Durov Nil bilan bog‘lanishga muvaffaq bo‘lgan-bo‘lmagani noma’lum.

2017-yilda Fransiya prezidenti etib saylangan Makron Telegram bilan hamkorlikni “taʼsirni kengaytirish nuqtai nazaridan strategik masala” deb hisobladi, dedi Libération nashriga Fransiya prezidentining sobiq ittifoqchisi.

2021-yilda Fransiya prezidenti bilan bir qator uchrashuvlardan so‘ng Durov fuqarolikni istisno tariqasida oldi. Biroq rossiyalikni fuqarolikka qabul qilish haqidagi so‘rov dastlab frantsuz rasmiylari tomonidan ma’qullanmadi, deb yozadi Le Monde. “Bu davlat rahbarining qarori edi, uning va faqat uning qarori”, dedi Makronning do’stlaridan biri Libération nashriga.