Politico: Tog‘li Qorabog‘dagi nizo davrida Belarus Ozarbayjonga qurol yetkazib bergan

2018-yildan 2022-yilgacha Tog‘li Qorabog‘da Boku va Yerevan o‘rtasidagi ziddiyat kuchaygan davrda Belarus Ozarbayjonga qurol-yarog‘ va harbiy yordam etkazib bergan, deb yozadi Politico Belarus tomonining sizdirilgan diplomatik va harbiy hujjatlariga tayanib.

Nashr Belarusning harbiy-sanoat korxonalariga qurol-yarog‘ eksporti bo‘yicha davlat agentligining maktublarini, shuningdek, Ozarbayjon uchun “Groza-S” raketaga qarshi mudofaa tizimlarini xarid qilishni muvofiqlashtirish bo‘yicha ikki davlat o‘rtasidagi yozishmalarni o‘rganib chiqdi. Politico nashrining yozishicha, Belarusdan Ozarbayjonga yordam eski artilleriya qurollarini modernizatsiya qilish, shuningdek, elektron urushlar va dronlar uchun ishlatiladigan yangi jihozlarni yetkazib berishni o‘z ichiga olgan.

Politico tomonidan ko‘rilgan diplomatik xabarlardan birida Belarus korxonalari “Ozarbayjonning bosib olingan hududlarini tiklashda, shuningdek, Belarus tovarlari va xizmatlarini mamlakatga eksport qilishda” faol rol o‘ynashi aytilgan.

Belarus va Armaniston Rossiya boshchiligidagi Kollektiv Xavfsizlik Shartnomasi Tashkiloti – KXShTga a’zo. Qozog‘iston, Qirg‘iziston va Tojikiston ham KXShTga a’zo. Politico yozganidek, Ozarbayjonga qator harbiy mojarolarda muhim ustunlik bergan KXShT ittifoqchisining ta’minot bo‘yicha qarori Yerevan tomonidan “achchiq xiyonat” sifatida baholandi.

Nashr suhbatlashgan ekspertlarning fikricha, Belarus “Kremlning jimjimador yordamisiz” harakat qila olmaydi.

“Bu jo‘natmalar Moskva bilmagan holda sodir bo‘lishi mumkin edi va agar Rossiya xohlasa, ularni to‘xtata olmasdi, deb o‘ylash kulgili. Moskva haqida gap ketganda, sodiqlik degan narsa yo‘q — bu o‘z xavfsizligingizni saqlab qolish haqida, hatto bu o‘z ittifoqchilari hisobidan bo‘lsa ham”, – deydi Ivana Stradner, Demokratiyani himoya qilish jamg‘armasi xodimi.

Ozarbayjon va Belarus hukumatlari izoh berish so‘rovlariga javob bermadi.