RF Mudofaa vazirligi Mirgorod aerodromida Ukrainaning beshta SU-27 samolyoti yo‘q qilinganini aytmoqda

Rossiya Mudofaa vazirligi Ukrainaning beshta Su-27 samolyotini Mirgorod aerodromida yo‘q qilganini aytmoqda. Rossiya harbiy idorasining matbuot xizmati, shuningdek, samolyotlarga qilingan hujum tasvirga olingan videoni ham chop etdi.

Rossiya Aerokosmik kuchlariga yaqin bo‘lgan Fighterbomber telegram kanali bir kun avval videoning uzunroq versiyasini e’lon qilgan, Rossiya harbiylari kamida beshta samolyotni urganini yozadi. “Har qanday holatda ham, bu maxsus harbiy amaliyot boshlanganidan beri biz tomondan aerodromga berilgan eng samarali zarbadir”, deb yozadi kanal.

Ukraina rasmiylari hodisaga rasman izoh bermadi, biroq aerodromga berilgan zarbani Ukraina qurolli kuchlari Harbiy-havo kuchlarining sobiq spikeri Yuriy Ignat tasdiqladi. Uning so‘zlariga ko‘ra, “zarba bo‘ldi”, “ma’lum yo‘qotishlar ham bor, lekin Rossiya armiyasi aytganiday emas”.

Rossiya qo‘shinlari Mirgorod aerodromiga deyarli har kuni, ba’zan kuniga bir necha marta hujum qiladi, deb yozadi Ukrainaning “Strana” nashri Ukraina qurolli kuchlari Harbiy havo kuchlari matbuot xizmatining iyun oyidagi ma’lumotlariga tayanib. Xmelnitskiy oblastidagi Starokonstantinov aerodromi ham muntazam ravishda o‘qqa tutilmoqda.

Jurnalistlarning fikricha, aerodromlarga hujumlar sonining ortishi F-16 qiruvchilarini mag‘lub etish amaliyoti bo‘lib, ular yaqin orada Ukraina qurolli kuchlari safiga kirishi kutilmoqda.