Ukraina qo‘poruvchilik-razvedka guruhi yana Rossiya chegarasini kesib o‘tishga uringani xabar berildi

Mash yozishicha, Ukraina qo‘poruvchilik-razvedka guruhi (QRG) yana Rossiyaning Belgorod viloyatida chegarani kesib o‘tishga urinmoqda, janglar Spodaryushino qishlog‘i yaqinida bormoqda.

Rossiya hududiga bostirib kirishga urinishlar haqida so‘nggi marta 12-mart kuni xabar berilgan edi. O‘shanda “Rossiya erkinligi” legion Tyotkino qishlog‘ining bir qismini bosib olganini ma’lum qilib, u yerda jangchilar tomonidan olingan videoni ilova qilgandi.

Keyinroq jurnalistlar video Ukraina qishlog‘ida suratga olinganini aniqladi. Tahlil shuni ko‘rsatdiki, u Rossiyaning Tyotkino qishlog‘idan 300 metr masofada joylashgan Ukrainaning Rijevka qishlog‘ida olingan. Legion vakili video Rijevka yaqinida tushirilganini tasdiqladi.

Rossiya Mudofaa vazirligi ma’lumotlariga ko‘ra, ushbu jang natijasida QRGning 30 a’zosi o‘ldirilgan.