Rossiya tomonidan KXDR askarlarining jalb qilinishiga javoban Janubiy Koreya Ukrainaga kuchliroq qurol-yarog‘ yetkazib berish haqida o‘ylamoqda

Janubiy Koreya Shimoliy Koreya va Rossiyaning harbiy hamkorligi chuqurlashib borayotganiga javoban ularga qarshi “bosqichma-bosqich choralar” ko‘radi. Seul Ukrainaga hujum va mudofaa qurollarini yuborish imkoniyatini ham ko‘rib chiqmoqda, deydi Janubiy Koreya milliy xavfsizlik bo‘yicha maslahatchining birinchi o‘rinbosari Kim Te Xyo. Bungacha mamlakat Kievga faqat noharbiy gumanitar yordam ko‘rsatish pozitsiyasiga amal qilayotgandi.

Kim bu haqda prezidentning Milliy xavfsizlik kengashining (MXK) favqulodda yig‘ilishidan so‘ng ma’lum qildi. Shimoliy Koreya Ukraina bilan urushda Rossiyaga yordam berish uchun 12 mingga yaqin askarini yuborishga qaror qilgani va ulardan 1,5 mingga yaqini Uzoq Sharqqa yetib borganligi haqidagi razvedka ma’lumotlari munosabati bilan chaqirildi. U yerda ular Xabarovsk yaqinidagi kazarmalarda buryatlar va yoqutlar qiyofasida mashg‘ulotlardan o‘tishadi.

Milliy xavfsizlik kengashi bu harakat Janubiy Koreya va xalqaro hamjamiyat uchun “xavfsizlikka jiddiy tahdid” ekanligini va BMT Xavfsizlik Kengashining Shimoliy Koreya bilan harbiy hamkorlikni taqiqlovchi rezolyutsiyalarining “ochiq-oydin buzilishi” ekanligini bildirdi. “Hukumat Shimoliy Koreya qo‘shinlarini zudlik bilan olib chiqib ketishga chaqiradi”, – deya ta’kidlaydi Kim. Uning ogohlantirishicha, agar bunday hamkorlik davom etsa, Seul “chekkada qarab turmaydi, balki xalqaro hamjamiyat bilan hamkorlikda qat’iy javob beradi”.