Shveytsariya O‘zbekistonda IT-ta’limga 150 ming dollar sarmoya kiritadi

Shveytsariya O‘zbekistonda IT-ta’limni rivojlantirish uchun 150 ming dollar miqdorida grant ajratdi. Asosiy e’tibor yoshlarning malakasini oshirish, xotin-qizlarni, ayniqsa, mamlakatimizning chekka hududlarida ish bilan ta’minlashga qaratiladi.

Hamkorlik shartnomasini O‘zbekiston raqamli texnologiyalar vaziri Sherzod Shermatov va Shveytsariya elchixonasi vakili Andrin Fink imzoladi. “O‘zbekistonda IT va raqamli ta’limni rivojlantirish orqali inklyuziv o‘sish uchun manfaatdor tomonlarni bog‘lash” loyihasi doirasida barcha fuqarolar uchun raqamli ko‘nikmalarni o‘rganish va IT kompetensiyalarini rivojlantirish uchun teng sharoitlar yaratish rejalashtirilgan.

Loyihaning birinchi bosqichida aholining raqamli ko‘nikmalari tahlili o‘tkaziladi, bozorda talab qilinadigan kasblar aniqlanadi va ta’lim IT platformasi ishlab chiqiladi. Tashabbus raqamli transformatsiyani jadallashtirish, iqtisodiy imkoniyatlarni kengaytirish va O‘zbekistonning jahon IT bozorida raqobatbardoshligini oshirishi kutilmoqda.