Suv toshqinidan jabrlangan Markaziy Yevropa mamlakatlari YeIning ko‘p milliardli yordamini oladi

Markaziy Yevropadagi toshqindan jabr ko‘rgan davlatlar Yevropa Ittifoqidan ko‘p milliard dollarlik yordam oladi. Bu haqda payshanba kuni Polshaning Vrotslav shahrida Yevrokomissiya raisi ma’lum qildi. Ursula fon der Lyayen jabrlangan mamlakatlar hukumat rahbarlari bilan uchrashdi, unda Polsha bosh vaziri Donald Tusk taklifiga binoan Slovakiya bosh vaziri Robert Fitso, Chexiya bosh vaziri Pyotr Fiala va Avstriya kantsleri Karl Nexammer qatnashdi.

O‘tgan haftada sodir bo‘lgan kuchli suv toshqinlari 24 kishining hayotiga zomin bo‘lgan va Markaziy Yevropa infratuzilmasiga katta zarar yetkazgan. Yig‘ilishda Yevrokomissiya rahbari jabrlangan davlatlarga pul ajratish uchun hech qanday qadamlar kerak emasligini bildirdi. Uning ta’kidlashicha, bunday paytda tezda harakat qilish kerak.

“Men aytmoqchimanki, so‘z 100 foiz Yevropa jamg‘armalari haqida bormoqda, bu favqulodda qadamlar tashlanishini talab qilmaydi, birinchi navbatda, jabrlangan mamlakatlar uchun 10 milliard dollar jalb qilinadi ”, – dedi Ursula fon der Lyayen.

Uning qo‘shimcha qilishicha, “sel toshqinlari natijasida yuzaga kelgan vayronagarchilik yurakni ranjituvchi manzaradir”. Ammo boshqa tomondan, u dedi, “odamlar o‘rtasidagi ulkan birdamlikni, … kecha-yu kunduz tinmay bu ofatni yengishda yordam beradigan son-sanoqsiz ko‘ngillilarni ko‘rish juda yoqimli edi”.

Polshada Vrotslav yaqinidagi Oder daryosidagi suv sathi 6,4 metrni tashkil etgan, bu kritik darajadan ikki metr yuqori. Shu bilan birga, kuzatuvchilar 1997-yildagi halokatli suv toshqini darajasiga hali erishilmaganini qayd etishmoqda. Qutqaruvchilarning so‘zlariga ko‘ra, hududdagi eng ko‘p jabrlangan ikki shahar – Stron-Slask va Ladek-Zdruyda suv va elektr ta’minoti tiklangan.

Chexiya Respublikasining shimoli-sharqida harbiy xizmatchilar qutqaruv ishlariga yordam berish uchun o‘t o‘chiruvchilar va qutqaruvchilarga qo‘shilgan. Armiya vertolyotlari gumanitar yordam tarqatmoqda, askarlar esa tabiiy ofat ta’sirida vayron bo‘lganlar o‘rniga vaqtinchalik ko‘priklar qurmoqda. Ostrava shahrida 400 ga yaqin odam uylaridan evakuatsiya qilingan.

Suv toshqinlari yo‘llarni yuvib, ko‘chkiga va ko‘priklar vayron bo‘lishiga olib kelgan Avstriyada tozalash ishlari davom etmoqda. O‘t o‘chiruvchilar va askarlar uylardan suv va loyni tortib olmoqda, deya xabar beradi ORF mahalliy teleradiokompaniyasi.

Kuchli yog‘ingarchilik Italiya shimolidagi Emiliya-Romanya hududida ham suv toshqini va 1000 kishining evakuatsiya qilinishiga sababchi bo‘lgan.