AQSH korporatsiyasi Ukrainada o‘q-dorilar ishlab chiqaradi

Amerikaning Northrop Grumman harbiy-sanoat korporatsiyasi Ukrainada o‘rta kalibrdagi o‘q-dorilarni ishlab chiqarishni boshlamoqchi. Bu haqda Breaking Defence nashri kompaniya vakili Deyv Bartellga tayanib xabar berdi.

“Northrop’ning qo‘shma ishlab chiqarish to‘g‘risidagi bitimi — AQSHning yirik mudofaa pudratchisi va Ukraina hukumati o‘rtasida Ukraina hududida ishlab chiqarish loyihasini amalga oshirish bo‘yicha ochiqchasiga tasdiqlangan birinchi kelishuvdir”, — deyiladi xabarda.

Bartellning so‘zlariga ko‘ra, kelajakda loyihani 155 mm kalibrli tank va artilleriya o‘q-dorilarini, shuningdek, boshqa snaryadlarni ishlab chiqarish hisobiga kengaytirish rejalashtirilgan. Reja bo‘yicha tafsilotlarni Northrop vakili keltirib o‘tirmadi.

AQSH davlat kotibining harbiy-siyosiy ishlar bo‘yicha yordamchisi o‘rinbosari Stenli Braun o‘z navbatida ta’kidlashicha, Davlat departamentining Ukraina mudofaa-sanoat bazasiga 2 milliard dollar investitsiya kiritishni ko‘zda tutuvchi yangi dasturi bundan keyingi Amerika-Ukraina qo‘shma ishlab chiqarishi uchun eshiklarni ochishi mumkin.

Northrop Grumman bosh qarorgohi Virjiniya shtatida joylashgan. Korporatsiya dunyoda mudofaa daromadi bo‘yicha uchinchi o‘rinda joylashgan (u yiliga 32,5 milliard dollarni tashkil etadi).