WP: Rossiyaning 250 ga yaqin muddatli chaqiruvdagi askari Ukraina asirligida saqlanmoqda

WP jurnalistlari Kursk oblastida asirga olingan rossiyalik harbiylar saqlanadigan joyga kirish imkoniga ega bo‘ldi. Nashrning yozishicha, 250 ga yaqin muddatli harbiy xizmatchi asirlikda saqlanmoqda.

So‘nggi o‘n kun ichida Ukraina qurolli kuchlari tomonidan asirga olingan 320 nafar rossiyalik harbiy xizmatchi Ukrainaning shimoli-sharqidagi lager orqali o‘tgan, ulardan atigi 20 foizi shartnoma asosidagi askarlar va safarbar qilingan askarlar bo‘lgan.

Nashrning ta’kidlashicha, jurnalistlar ko‘rgan “mahbuslarning aksariyati” jarohat olmagan. Yaradorlarning bir nechtasi asirga olinmasdan oldin jang paytida yaralanganini aytgan.

Harbiy xizmatchilardan birining nashrga aytishicha, u asirga tushmaslik uchun o‘zini granata bilan portlatmoqchi bo‘lgan, shundan so‘ng Ukraina qurolli kuchlari askarlari unga birinchi tibbiy yordam ko‘rsatib, kasalxonaga evakuatsiya qilgan.

Mahbuslar WP nashriga ularga yaxshi muomala qilingani, tibbiy yordam ko‘rsatilgani, kuniga uch marta ovqatlangani va dush olishiga ruxsat berilganini aytishmoqda. Nashr suhbatlashgan asirlarga ko‘ra, ularga qarindoshlariga xat yozish uchun qog‘oz ham berilgan.

Jurnalistlar bilan suhbatlashgan muassasa rahbarining aytishicha, asirlar bu yerdan  Ukraina hududidagi boshqa lagerlarga ko‘chiriladi.