Yaponiya bosh vaziri parlamentda qayta saylanayotgan paytda mudrab o‘tirdi

Yaponiya Bosh vaziri Isiba Sigeru parlament yig‘ilishida o‘zining qayta saylanishi uchun ovoz berish chog‘ida uxlab qoldi. Bu haqda Kuodo News va Japan Times  nashrlari yozadi.

Yaponiyada Sigeruning hukmron koalitsiyasi nazoratni yo‘qotganidan so‘ng o‘ttiz yil ichida birinchi marta bosh vazir lavozimi uchun parlament saylovlarining ikki bosqichi o‘tkazildi. Yaponiya ommaviy axborot vositalarining qayd etishicha, natija kutilgan edi, lekin baribir hokimiyat uchun kurashdan dalolat beradi.

Qonunchilar ovozlar sanalishini kutayotgan bir paytda Isiba Sigeru uxlab qolganga o‘xshardi. Jurnalistlar uni pastga qaragan va ko‘zlarini qisqa yumgan holda suratga olishgan.

Asosiy muxolifat partiyasining rahbari Yosixiko Nodu uni tanqid qildi: “Agar u haqiqatan ham uxlab yotgan bo‘lsa, bu unda sezilarli zo‘riqish yo‘qligini ko‘rsatadi“.

Kechqurun o‘tkazilgan matbuot anjumanida Yaponiya hukumati vakilining tushuntirishicha, bosh vazir “kechgacha ish bilan nihoyatda band bo‘lgan, shamollab qolgan va shamollashga qarshi dori ichgan”. Uning qo‘shimcha qilishicha, shamollashdan tashqari sog‘lig‘ida hech qanday muammo yo‘q.

Yaponiya Innovatsiyalar partiyasining sobiq rahbari Nobuyuki Babaning aytishicha, u Isibaning charchaganiga ishongan bo‘lsa-da, uning xatti-harakatlari “noo‘rin” bo‘lgan: “Biz hukumatning uchta tarmog‘idan birining boshlig‘ini belgilash uchun saylov o‘tkazdik, shuning uchun men saylovlar paytida dam olishni noo‘rin deb hisoblayman“.

Eslatib o‘tamiz, Sigeru Isiba hukumat rahbari lavozimiga faqat oktyabr oyida kelgan. Bosh vazirni qayta saylash uchun ovoz berish uning shov-shuvga uchragan koalitsiyasi parlament quyi palatasiga saylovlarda ko‘pchilikni yo‘qotganidan keyin bo‘lib o‘tdi.

Ovoz berishning birinchi bosqichida nomzodlarning hech biri ko‘pchilik tomonidan qo‘llab-quvvatlanmadi. Isiba ikkinchi turda 221 ovoz bilan g‘alaba qozondi. U asosiy muxolifatdagi Konstitutsiyaviy-demokratik partiya yetakchisi va sobiq bosh vazir Yosixiko Nodudan sezilarli o‘zib ketdi. Ammo u hali ham 2012-yildan beri o‘z siyosiy kuchiga ega bo‘lgan ko‘pchilikni qo‘lga kirita olmadi.