Yevropa komissiyasi rahbari Ursula fon der Lyayen Kiyevga keldi

Italiya, Kanada va Belgiya bosh vazirlari, shuningdek, Yevrokomissiya rahbari mamlakatda urush boshlanganining ikki yilligi munosabati bilan Ukrainaga keldi. Ularning tashrifi ushbu qiyin davrda Ukraina bilan birdamlikni ifodalash maqsadida tashkil etilgan. Liderlar Kiyevga Polshadan poyezdda yetib keldi, deya xabar bermoqda Reuters Italiya hukumati bayonotiga tayanib.

“To‘rt nafar G‘arb yetakchilari, jumladan, Italiya, Kanada va Belgiya bosh vazirlari shanba kuni Kiyevga kelib, harbiy harakatlar boshlanganining ikki yilligi munosabati bilan Ukraina bilan birdam ekanliklarini bildirishdi”, — deyiladi xabarda.

Italiya bosh vaziri Kiyevdan videokonferensiya orqali G7 yetakchilarining uchrashuvini o‘tkazishni rejalashtirmoqda, unda Ukraina prezidenti Vladimir Zelenskiy ham ishtirok etishi kutilmoqda.

Ukrainadagi urush 2022-yil 24-fevralda boshlangan. Ikkinchi yilligida Rossiyaga qarshi sanksiyalar AQSH, Kanada va Avstraliya kabi bir qancha davlatlar tomonidan kiritilgan va Yevropa Ittifoqi tomonidan qo‘shimcha choralar ko‘rish rejalashtirilmoqda.