Ўзбекистонда Ягона геология хизмати ташкил қилинди

Ўзбекистон Республикаси Президентининг  қарори билан Ўзбекистон Республикаси Ягона геология хизмати ташкил қилинди. Мамлакатимиз раҳбариятининг топшириғига мувофиқ “Навоий КМК” ДК ва “Олмалиқ КМК” АЖ қимматбаҳо ва рангли металлар ишлаб чиқаришни сезиларли даражада кўпайтиришга доир чора-тадбирларни амалга оширишга киришилди. Шу билан бирга, уран ишлаб чиқариш ҳажмини кенгайтириш бўйича чора-тадбирлар ишлаб чиқилмоқда, бу эса ўз навбатида комбинатларнинг хомашё негизини такрор ишлаб чиқариш учун тезкор тарзда янги конларни тайёрлашни талаб қилади.

Республика ягона геология хизматининг яратилиши ер қаърини геологик ўрганиш, ундан фойдаланиш ва муҳофаза қилиш, шунингдек кончилик муносабатларини бошқариш соҳасида ягона давлат сиёсатини амалга оширилишини таъминлайди.

Шунингдек у республика минерал-хомашё негизининг илгарилама ривожланишини, энг аввало ер ости сувлари, қимматбаҳо, рангли, нодир, камёб ер металлари ва уранни, янги турдаги минерал хомашёларни ва уларнинг конларини тезкор излашга қаратилган.

Илмий-ишлаб чиқариш марказлари кўринишидаги оралиқ бошқарув бўғинларини тугатиш ва соҳани бошқарувчи марказий девонни тегишли даражада кучайтириш ҳисобига геология-қидирув ишларини икки босқичли бошқаришга ўтиши таъминланади.
 
Химзмат шунингдек минерал-хомашё негизини ва такрор ишлаб чиқаришни ривожлантиришнинг узоқ муддатли, ўрта муддатли ва йиллик давлат дастурлари мониторинги ва амалга оширилишини назорат қилинишини, ер қаърини геологик ўрганиш, уларнинг ҳажми, сифати ва натижаларининг ишончлилигини объектив баҳолашни таъминлаши лозим.

Бундан ташқари, юқори малакали олий маълумотли кадрларни тайёрлаш мақсадида республика олий ўқув юрларида геология соҳаси учун зарур йўналиш ва ихтисосликларнинг очилиши, кадрларнинг малака даражасини ошириш бўйича тизимли чора-тадбирлар амалга ошириш, уларнинг меҳнатини рағбатлантириш механизмини самарали жорий қилиш ҳам кўзда тутилган.