АҚШнинг Афғонистон бўйича махсус вакили Тошкентга ташриф буюради

АҚШнинг Афғонистон бўйича махсус вакили Залмай Халилзод Қатар, Покистон ва Ўзбекистонда бўлади. Халилзод Афғонистондаги тинчлик жараёнини муҳокама қилиш учун 28 июнь куни Дохага жўнаб кетди, дейилади Давлат департаментининг хабарида.
 
«Учала жойда ҳам махсус вакил Халилзод афғонлараро музокаралар арафасида афғонлар томонидан ўз мажбуриятларини бажаришни қўллаб-қувватлашга чақиради», — дея қайд этилади хабарда.

Бундан ташқари, Халилзод масофадан туриб Афғонистоннинг расмий шахслари билан музокаралар ўтказади. Сафарда унга Америка халқаро ривожланиш молия корпорациясининг раҳбари Адам Болер ҳамроҳлик қилади.
 
«Делегация Афғонистоннинг иқтисодий тикланишига кўмаклашиш ва минтақада барқарор тинчлик ва барқарорликни қўллаб-қувватлаш учун қатор секторларга инвестиция қилиш ва ҳамкорлик қилиш имкониятларини ўрганади», — дейилади пресс-релизда.