Бухорода оилавий жанжал оммавий муштлашувга айланиб кетди, воқеа иштирокчиларидан бирини қасддан машинада босиб кетишга уринишди

Ижтимоий тармоқларда Олот туман «Асажам» МФЙда содир бўлган жанжал видеоси тарқалди. Видео юзасидан Бухоро вилояти ИИБ ахборот хизмати расмий муносабат билдирди.

Маълум қилинишича, 2020 йилнинг 5 сентябрь куни тахминан соат 14:30 ларда Олот туман «Асажам» МФЙда яшовчи фуқаро М.А. собиқ турмуш ўртоғи Г.Э. билан биргаликдаги турмуши давомида туман ҳокимлиги томонидан ажратилган ер майдонига қурилган савдо ва хизмат кўрсатиш шохобчасига, онаси Д.Ч. ва янгаси Р.Ч. лар билан борган вақтида, собиқ турмуш ўртоғи Г.Э. ва унинг акаси У.Э., отаси К.Э., амакилари — И.Э., Г.Э. ҳамда бошқа қариндошлари уларни ножўя сўзлар билан ҳақорат қилиб, бир-бирларини уриб тан жароҳати етказганлик ҳолати Олот тумани Ички ишлар бўлими томонидан белгиланган тартибда рўйхатга олинган.

Видеотасвирда мазкур ҳодиса вақтида икки нафар ички ишлар органлари ходимлари жанжаллашаётган фуқароларни ажратаётганлик ҳолати кўринган. Ушбу ходимларнинг бири туман Ҳуқуқубузарликлар профилактикаси инспектори лейтенант Х.Абдураҳмонов, иккинчиси вилоят ИИБ Ҳуқуқбузарликлар профилактикаси бошқармаси МТБ инспектори капитан М.Шамсиев.

Жанжал вақтида фуқаро Г.Э. ва унинг қариндошлари, чақирувга асосан ҳодиса жойига етиб келган туман ИИБ XPБ профилактика инспектори лейтенант Х.Абдураҳмоновнинг қонуний талабларини бажармасдан, собиқ турмуш ўртоғи М.А. билан бир-бирларини ҳақорат қилиб ўзаро жанжаллашиб кетишган. Шу вақтда юритувида бўлган ариза юзасидан суриштирув ҳаракатларини ўтказиш учун Олот туманига бораётган Бухоро вилояти ИИБ Ҳуқуқбузарликлар профилактикаси бошқармаси МТБ инспектори капитан М.Шамсиев йўлдан ўтиб кетаётиб, мазкур жанжални кўриб қолган ва жанжални бартараф қилиш чораларини кўрган.

Шунингдек, ушбу жанжал вақтида фуқаро Г.Э.нинг акаси У.Э. амакиси Ғ.Э.га тегишли бўлган Cobalt русумли 80У181ОА давлат рақамли автомашинанинг олд қисми билан фуқаро М.А. ни қасддан уриб юбориб, унга тан жароҳати етказган.
 
Мазкур ҳолат юзасидан ҳодиса жойи кўздан кечирилиб, барча иштирокчилардан ҳамда мазкур жанжалнинг гувоҳи бўлган фуқаролардан тушунтириш хатлари олинган.

Ҳолат юзасидан жанжалда иштирок этган барча фуқароларга етказилган тан жароҳатларининг оғирлик даражасини аниқлаш мақсадида судга оид тиббий экспертиза тайинланиб, Олот тумани ҳузуридаги тергов бўлинмаси томонидан терговга қадар текширув ҳаракатлари олиб борилмоқда.