Ҳуқуқ ҳимоячиси коррупция учун қамалган собиқ прокурорлар нима билан шуғулланаётгани ҳақида гапириб берди

Ўзбекистон инсон ҳуқуқлари “Эзгулик” жамияти раиси Абдураҳмон Ташанов Facebook’даги саҳифасида ИИВ Жазони ижро этиш бош бошқармаси тизимидаги 22-сонли колонияга ташрифи таассуротлари ҳақида ёзди, дея хабар беради UzNews.

У қамоқ жазосини ўтаётган собиқ бош прокурорлар Рашид Қодиров ва Ихтиёр Абдуллаев билан суҳбатлашди.

«Аввал мамлакатимизга уч муддат бош прокурорлик қилган Рашид Қодиров билан суҳбатлашдик. У кишидан шароитлар, маҳкумларга муомала ҳақида сўрадим. Ҳар ҳолда ҳушёр одам — яқин бир ойда манзил колонияга чиқишини, шикоятлари йўқлигини, БМТ структураларига қийноқлар бўйича шикоят қилмаганини, соғлиғи яхшилигини айтди. “Юрак бўйича аввалроқ сангородда даволангандик, ҳозир ҳаммаси яхши” деди Қодиров», — деб ёзади Абдурахмон Ташанов.

Ҳуқуқ ҳимоячисининг сўзларига кўра, айни пайтда Рашид Қодиров тикув цехида ишламоқда.

“Унинг қўлидан чиққан гулдор матолардан тикилган бежирим аёллар кўйлаги, лозими ва бошқа ашёлар кўзни қувонтиради. Шерикларимиз расмларга олишди, ҳадемай бу расмлар чоп қилинса керак”, – деб ёзади “Эзгулик” фаоли. 

Абдурахмон Ташанов ўзининг колонияга ташрифи давомида Ихтиёр Абдуллаев билан ҳам учрашди.
 

Фотосурат: Абдурахмон Ташанов

«Генерал Абдуллаевни чинни цехида идишга нақш солаётган жараёнда учратдим. Унгача муассасанинг тиббий бўлимига кириб, у кишининг тиббий картаси билан танишгандим. Таъкидлаш керакки, икки собиқ бош прокурор ҳам ўта эҳтиёткорлик билан муомалада бўлди. Тўғрироғи, комиссияларнинг нималиги, қаергача бора олишини ўтмишдаги фаолияти орқали яхши биладиган бу мулозимлар вазиятни мураккаблаштириб ўтиришмади. Ҳар ҳолда менга шундай туюлди», — дейди ҳуқуқ фаоли.

“Цехлардан чиқаётиб, собиқ МХХ полковниги Жавдат Шарифхўжаев билан кўришдим. У гапни қисқа қилиб, ҳеч қандай шикояти йўқлигини таъкидлаган ҳолда қочиб қолди”, – қўшимча қилади Абдураҳмон Ташанов..

Ҳуқуқ ҳимоячисининг сўзларига кўра, колонияга ташриф унда ғалати таассуротларни қолдирган.

«Ғалатироқ таассуротлар билан қайтдим. Бир пайтлар улар билан суҳбатлашиш, сўроққа тутиш тугул олдига бора олмаганимиз бу одамлар бугун маҳзун, аввалги салобатдан асар ҳам йўқ», – дея хулоса қилади Абдурахмон Ташанов.

Эслатиб ўтамиз, 2000-2015 йилларда Ўзбекистон бош прокурори лавозимида ишлаган Рашид Қодиров 2019 йилда 10 йил озодликдан, бош прокурор ва ДХХ раиси лавозимларида ишлаган Ихтиёр Абдуллаев эса 2019 йилда 18 йил муддатга озодликдан маҳрум қилинганди.