Самарқандда трамвай линияларини эксплуатация қилиш дирекцияси ходимлари 1 млрд сўмдан ортиқ маблағни ўзлаштиргани аниқланди

Иқтисодий жиноятларга қарши курашиш департаментининг Самарқанд вилоят бошқармаси ҳамда ДХХ ходимлари томонидан “Трамвай линияларини эксплуатация қилиш дирекцияси” давлат корхонасига нисбатан тергов иши ўтказилди. Ҳолат юзасидан ўзлаштириш ёки растрата йўли билан талон-торож қилиш ҳамда жиноий фаолиятдан олинган даромадларни легаллаштириш билан боғлиқ жиноят иши очилган, дея хабар беради Zarnews нашри бошқарма матбуот хизматига таянган ҳолда.

Аниқланишича, Самарқанд шаҳар ҳокимлиги қошидаги “Трамвай линияларини эксплуатация қилиш дирекцияси” давлат корхонаси мансабдор шахслари 2017-2019 йиллар давомида олдиндан тил бириктириб, бир гуруҳ бўлиб, корхонанинг 74,6 миллион сўм маблағларини хизмат сафари учун асоссиз чиқим қилишган.

Бундан ташқари, ходимларнинг иш ҳақига асоссиз равишда 235,8 миллион сўм қўшиб ёзишган ҳамда банкдан иш ҳақи учун олинган 112,3 миллион сўмни ходимларга тарқатишмаган.

Шунингдек корхона мансабдорлари корхонада ишламаган фуқароларнинг контракт тўлови ва бошқа харажатлари учун 137 миллион сўм маблағ ўтказишган. Бошқа корхоналарга молиявий ёрдам сифатида 62,5 миллион ҳамда корхонанинг корпоратив картасидан 636,1 минг сўм асоссиз чиқим қилишган.

Шу тарзда мансабдорлар давлат корхонасининг 1 миллиард 258,3 миллион сўм маблағини ўзлаштириш ва растрата қилиш йўли билан талон-торож қилишган.

Шу билан бирга, “Трамвай линияларини эксплуатация қилиш дирекцияси” давлат корхонаси мансабдор шахслари давлат корхонаси мулкини ўзлаштириш йўли билан қўлга киритган маблағларининг 232,4 миллион сўмини Самарқанд шаҳар Ал-Хоразмий кўчасида қурилган кўп қаватли уйдан 3 хона хонадонни сотиб олиш учун “М.Д.Б” МЧЖга ўтказиб беришган. Яъни, жиноий фаолиятдан олган даромадларини легаллаштирган.

Ҳолат юзасидан департаментнинг вилоят бошқармаси томонидан “Трамвай линияларини эксплуатация қилиш дирекцияси” давлат корхонаси мансабдор шахсларига нисбатан Жиноят кодексининг 167-моддаси 3-қисми “а” банди ва 243-моддаси билан жиноят иши қўзғатилган.