Италия фуқароси ўзининг Ўзбекистондаги саргузаштлари ва ҳибсга олиниши ҳақида сўзлаб берди

Ўзбекистонга Delorazepam номли психотроп моддани олиб ўтгани учун ҳибсга олинган Италия фуқароси, 53 ёшли доктор Норберт Пескоста Италияга қайтди. Бу ерда у ўзининг Ўзбекистондаги саргузаштлари ҳақида гапириб берди.

«Бу саргузаштни унутишим даргумон, ўзимга келишим учун менга вақт керак», – дея тан олади доктор. Норберт ўз оғайнилари билан Самарқандга боришга қарор қилади. Муаммолар Нукус чегарасида Норбертнинг сумкасидан тинчлантирувчи препарат топилганида бошланади:

«Суҳбатни олиб бориш жуда қийин кечди, чунки биз на рус тилини, на ўзбек тилини билардик. Бу дори менга нега кераклиги ҳақидаги саволга мен дори муайян безовталик дақиқаларида, айниқса биз боришни мўлжаллаган иссиқ жойларда асқотиб қолиши мумкинлигини айтдим. Мен унинг гиёҳванд модда сифатида қабул қилиниши мумкинлиги ҳақида тасаввур ҳам қилмагандим».

Сўроқдан кейин италияликларни меҳмонхонага жойлаштиришади. Норбертга “гиёҳванд моддаларни сақлаш ва олиб кириш” деган жиддий айблов турарди. Норбертнинг дўстлари Италияга қайтади, унинг рафиқаси эса Италиянинг Ўзбекистондаги элчисига мурожаат қилади.
 
«Мен ҳар куни Италия элчиси билан мулоқот қилардим. Бу одамлар шундай масалалар билан шуғулланишга ўрганган. Мени дўстларим, ўзим билан кўплаб кишилар қўллаб-қувватлаб турди. Бу ўша кунлари мен учун ягона таскин эди, у пайтда бу ёқимсиз ҳолат қандай якун топишини билмасдик. Қамоқхонага тушишдан жуда қўрққандим».

Охир-оқибатда ҳаммаси яхшилик билан тугади, Норберт оқланди, аммо энди унга беш йил давомида Ўзбекистон ҳудудига кириш тақиқланган:

«Менга бириктириб қўйилган ҳуқуқни муҳофаза қилиш органларининг зобити жуда ёрдам берди. У бироз инглиз тилини биларди, чипта сотиб олишимга кўмаклашди, ҳатто бошқа одамлар билан ҳам таништириб қўйди. Умуман олганда, менга жуда яхши муносабатда бўлишди», – дейди доктор.

Унинг сўзларига кўра, олдинига унга жиноятчи сифатида қарашган, кейин эса тушуниш билан муносабатда бўлишган.

«Жума куни кечқурун мен яна ўз оиламни бағримга босдим. Ўша пайтда қай даражада таваккал қилганимни тушундим», – дейди Норберт ва Ўзбекистонга бормоқчи бўлганларга “Агар ўзингиз билан бирор-бир препаратни олган бўлсангиз, ҳар доим инглиз тилига таржима қилинган рецептни ўзингиз билан олиб юринг ва жўнашга қарор қилган мамлакатингизнинг қонунчилигини яхшилаб ўрганинг», – дея маслаҳат беради.