12 та туман ҳокими “Яшил макон” лойиҳаси доирасида кўчат экишни бошламагани учун огоҳлантирилди

Бугун ўтказилган видеоселектор йиғилиши сўнгида “Яшил макон” умуммиллий лойиҳасини амалга ошириш бўйича вазифалар ижроси ҳам кўриб чиқилди.  Қўшработ, Каттақўрғон, Томди, Дўстлик, Арнасой, Фориш, Янгиариқ, Шеробод, Термиз, Музработ, Ғузор, Китоб туманларида кўчат экиш ишлари ҳалигача бошланмаган.  Йиғилишда ушбу туман ҳокимлари қатъий огоҳлантирилди. Тегишли вилоятлар ҳокимларига ушбу туман ҳокимларига интизомий чора кўриш бўйича топшириқ берилди, деб ёзади ЎзА.

Қорақалпоғистон Республикаси, Наманган, Тошкент вилоятлари ва Тошкент шаҳрида “Яшил макон” умуммиллий лойиҳасини амалга оширишга фаол киришилган. Лекин Сурхондарё, Сирдарё ва Хоразм вилоятларида дарахт экиш анча ортда қолмоқда.

«Бир нарсани аниқ тушуниш керак, вилоят, туман ва шаҳар ҳокимлари уч кун муддатда ўзининг ҳудудида халққа мурожаат қилади, Президент ва Сенатга қилинган ишлар ҳақида ҳар ойда ҳисобот беради. Бунда қўшиб ёзиш, рақамларни бўрттириб кўрсатиш, пала-партиш ишлар кетмайди», — деди Шавкат Мирзиёев.

Йиғилишда вазирлик, тармоқ, корхона раҳбарлари ўз тизимида режалар бажарилишига масъул бўлиши таъкидланди. Бунинг учун ҳар бир вазирлик, идора, вилоят ёки туман ва шаҳар ҳокими ўзига мажбурият олиши айтилди. Президент икки кун муддатда ҳар бир ташкилот, туман ва маҳалла кесимида кўчат экиш графикларини тасдиқлаш бўйича топшириқ берди.