Айрим давлат олий ўқув юртлари таълим қийматини мустақил белгилайдиган бўлди

Ўзбекистон президенти “Давлат олий таълим муассасаларига молиявий мустақиллик бериш чора-тадбирлари тўғрисида”ги қарорни имзолади. Қарор билан молиявий мустақиллик берилаётган давлат ОТМ рўйхати (35 та) тасдиқланди.

Молиявий мустақил давлат ОТМлари 2022 йил 1 январдан қуйидагилар бўйича мустақил қарор қабул қилади:

– контракт қийматини, тўлаш муддатларини белгилаш ва узайтириш;

– маҳаллий ва хорижий профессор-ўқитувчи ва мутахассисларни шартнома асосида жалб қилиш;

– ўз ҳисобидан талабалар учун стипендия ва грантлар ажратиш;

– хориждан ўқув ва илмий адабиётлар, дарсликлар, ўқув қўлланмаларни тўғридан-тўғри харид қилиш;

– бўш турган бино ва иншоотларда пуллик хизматлар кўрсатиш тартибини белгилаш;

– автотранспорт воситаларининг йўл босиш йиллик лимити ва уларга хизмат кўрсатиш талабларини белгилаш.

Шунингдек қарорга кўра, ички аудит ва молиявий назорат хизматлари учун давлат ОТМ харажатларини онлайн мониторинг қилиш имконияти яратилади.