Қалбаки ҳужжатлар ва талон-торож қилинган маблағлар фош этилди

Самарканд вилояти Нарпай туманида давлат бюджети маблағларини талон-торож қилиш билан боғлиқ жиноят фош этилди. Ушбу жиноятни содир этган Турдибек Даминов (исм ўзгартирилган) давлат бюджетидан 4 миллиард 164 миллион сўмни ноқонуний йўл билан ўзлаштиргани aniqlandi.Bu ҳақида Ўзбекистон Республикаси Олий суди Жамоатчилик билан алоқалар маркази раҳбар хабар бермоқда.

Даминов илгари ҳам шунга ўхшаш жиноятлар учун уч марта судланган бўлса-да, бу сафар у яна фирибгарликка қўл урди. У давлат ва хусусий шериклик асосида амалга оширилиши лозим бўлган лойиҳалар бўйича қалбаки ҳужжатлар тайёрлаб, бюджет маблағларини ўзлаштирган.

Аниқланишича, Даминовнинг раҳбарлик қилаётган «Н.Н.Н.» МЧЖ корхонаси давлат билан 8 миллиард сўмлик келишув имзолаган. Аммо лойиҳалар тўлиқ бажарилмагани ҳолда, улар бажарилгандек ҳужжатлар тайёрланган. Текширувлар давомида мактаблар ва мактабгача таълим муассасаларидаги қурилиш ва модернизация ишлари амалга оширилмагани, аммо уларнинг амалга оширилганига доир қалбаки ҳисоб-фактуралар тақдим этилгани маълум бўлди.

Судда Даминовнинг айби тўлиқ исботланди. Жиноят кодексининг 167-моддаси ва 228-моддаси бўйича айбдор деб топилган Даминовга 3 йил муддатга ахлоқ тузатиш жазоси тайинланди.

Ушбу ҳолат шуни кўрсатадики, давлат маблағларини ўзлаштириш ёки талон-торож қилиш жиддий жиноят бўлиб, қилмиш қонун олдида жазога тортилиши билан якун топади. Шу сабабли бундай ноқонуний ишлар билан шуғулланиш ҳар қандай шахс учун ўз ҳаётига соя солиши мумкин.