Қашқадарёда вояга етмаган қизни турмушга чиқишга мажбур қилишди

Қашқадарёда 2006 йилда туғилган қизни турмушга чиқишга мажбур қилишган. Болалар омбудсмани вазиятни назорат остига олди.

15 январь куни Шаҳрисабз шаҳрида яшовчи фуқародан ёрдам сўраб мурожаат келиб тушган, 16 январь куни эса болалар омбудсмани Сурайё Раҳмонова қиз билан учрашган. Қизнинг айтишича, у университетда биринчи курсда ўқийди ва ўқишни давом эттирмоқчи. Шу билан бирга, бир неча йиллардан бери таниш бўлган йигит уни турмушга чиқишни қатъият билан сўрамоқда. Ўғил ва қизнинг ота-онаси қиздан розилик сўрамай, унаштириш маросимини ўтказишган.

Қизнинг сўзларига кўра, энди йигит унга психологик босим ўтказмоқда, турмушга чиқишга кўндиришга ҳаракат қилмоқда.

Вазият назорат остига олиниб, ички ишлар бошқармаси ва прокуратура ходимлари вазият билан танишди. Йигит ва қизнинг ота-онаси қизни никоҳга мажбурлаш жиноий жавобгарликка тортиш учун асос экани ҳақида огоҳлантирилди. Бундан ташқари, қизга ҳимоя ордери берилди ва унинг хавфсизлигини таъминлаш чоралари кўрилди.

47-модданинг 3-қисмига (Никоҳ ёши ёки никоҳ тузиш тартиби тўғрисидаги қонун ҳужжатларини бузиш) кўра, ҳуқуқбузарлик 5 бараваридан 10 бараваригача миқдорда жарима солишга сабаб бўлади. 136-моддада (Аёлни турмушга чиқишга мажбурлаш ёки турмушга чиқишига тўсқинлик қилиш) – жаримадан тортиб 3 йилгача озодликдан маҳрум қилишгача бўлган жазони кўзда тутади.