BBC: Осиё ва Яқин Шарқ мамлакатларида мухолифотдаги россиялик артистлар билан нималар содир бўляпти

Максим Галкин “Инстаграм” тармоғидаги каналида Индонезиянинг Бали оролида 27 январь куни бўлиб ўтиши керак бўлган концерти бекор қилингани ҳақида пост эълон қилди. Моргенштерн ўзининг “Инстаграм” саҳифасида сўнгги икки йил давомида яшаган Дубайга киришига рухсат беришмаганини айтди. Пайшанба куни Таиландга иккита концерт билан келган Россиянинг «Би-2» гуруҳи аъзолари қўлга олингани маълум бўлди. Паттая шаҳридаги биринчи концерт муваффақиятли ўтди, Пхукет оролида эса маҳаллий сайёҳлик полицияси гуруҳни ҳибсга олди. Ҳибсга олишга ишлашга рухсатнома йўқлиги сабаб қилиб кўрсатилган. Максим Галкин, Моргенштерн ва “Би-2” гуруҳи аъзолари Россияда хорижий агентлар сифатида тан олинган.

Максим Галкин ишчи виза ва барча ҳужжатлар жойида эканлигини маълум қилган. “Сабаби деярли дарҳол айтилди ва турли чегара хизмати ходимлари томонидан бир неча бор такрорланди, яъни мени Балига киритмаслик сўралган Россия ҳукуматининг хати. Хатни менга кўрсатишди, лекин, албатта, улар мулойимлик билан нусхасини беришдан бош тортишди”, — деб ёзади Галкин.

Артист Индонезия ҳукумати ўз ташаббуси билан эмас, балки «Россия Федерациясининг илтимосини» қондираётганини билдириб, сотиб олинган чипталар учун пул қайтарилишини ваъда қилди.

Аввалроқ унинг январь ойидаги иккита концерти Таиланд ва Қозоғистонда бекор қилинган эди. Галкиннинг фикрича, бунда Россия ҳукуматининг қўли бор. Январь ойида артист Дубайда концерт вақтида Россияга қарши баёнотлар қилгани учун 2,5 миллион рубль жаримага тортилган эди.

“Би-2” гуруҳининг ҳар бир аъзоси эса 95 доллардан жаримага тортилган. Пхукетдан “Би-2” иштирокчилари Бангкокка юборишмоқчи, кейин эса Таиланддан депортация қилинади. Бу ҳақда бугун Россиянинг Пхукет провинциясидаги бош консули Владимир Соснов маълум қилди.

«Бугун биз Пхукет провинцияси иммиграция полицияси департаментидан “Би-2” гуруҳи аъзолари, етти киши, яқин кунларда кейинчалик депортация қилиш учун Бангкокдаги Таиланд Қироллик Иммиграция бюросининг Вақтинчалик ҳибсга олиш марказига ўтказилиши ҳақида маълумот олдик», – дея иқтибос келтиради Сосновнинг сўзларидан  ТАСС.

Январь ойида Comedy Club’нинг собиқ резиденти Руслан Белий Таиланд ва Индонезияда «бекор қилинган» яна бир рус артистига айланди, у ҳам Россияда «иноганет» сифатида тан олинган. Унинг Таиланднинг Паттая ва Пхукет шаҳарларида иккита концерти ва Индонезиянинг Бали оролида битта концерти режалаштирилган эди. BBC билан суҳбатда Белий концертлар бекор қилиниши мумкинлиги ҳақида миш-мишлар тарқала бошлаганини, шунинг учун улар концертларни ўтказмасликка қарор қилишганини айтди.

Россиянинг Индонезиядаги консуллиги воқеаларга расмий изоҳ бермади.