Бошқирдистон раҳбари намойишчиларни республикани Россиядан ажратишга уринганликда айблади

17 январь куни Баймакдаги намойишлар чоғида 40 киши, жумладан, 22 полициячи ва 18 нафар намойишчи жабрланди, деб ёзади хавфсизлик кучларига яқин бўлган “База” таблоид канали.

Нашрнинг ёзишича, жароҳатланган митинг иштирокчилари асосан кўздан ёш оқизувчи газдан фойдаланиш оқибатларидан шикоят қилган. Уларга воқеа жойида тиббий ёрдам кўрсатилган.

18 январь куни эрталаб Бошқирдистон раҳбари Радий Хабиров митинглар ҳақида фикр билдирди. У “экстремизмга ва вазиятни бузишга уринишларга тоқат қилмаслигини” айтди ва минтақани “тинч чўпон ниқобидаги яхши фаоллардан” ҳимоя қилишга ваъда берди.

“Баъзилари хорижда бўлган, моҳиятан сотқин бўлган бир гуруҳ одамлар Бошқирдистонни Россиядан ажратишга чақирмоқда. Улар бу ерда партизанлар урушига чақирмоқда”, – дейди Хабиров.

Бир кун аввал Бошқирдистон суди фаол Фаил Алсиновни “миллатлараро адоват қўзғаш” моддаси бўйича тўрт йилга озодликдан маҳрум қилди. Ҳукмдан кейин бир неча минг республика аҳолиси суд биносига келди. Полиция уларга қарши кўздан ёш оқизувчи газ ва шовқинли гранаталардан фойдаланган.

Намойишлар натижасида хавфсизлик кучлари оммавий тартибсизлик ва ҳокимият вакилларига нисбатан зўравонликни қўллаш моддалари бўйича жиноий ишлар қўзгатилган. Олти нафар намойишчи маъмурий қамоққа олинган.