Буюк Британия Фаластин давлатини тан олиш имкониятини кўриб чиқмоқда

Буюк Британия ва унинг иттифоқчилари узоқ давом этган Исроил-Фаластин можаросига барҳам бериш учун икки давлат асосидаги ечим йўлида “қайтариб бўлмас ривожланиш”га эришиш бўйича дипломатик саъй-ҳаракатларнинг бир қисми сифатида Фаластин давлатини тан олиш масаласини кўриб чиқади, – деди душанба куни ташқи ишлар вазири лорд Дэвид Кэмерон.

Британия Исроил ва Хамас ўртасидаги урушни тўхтатиш бўйича саъй-ҳаракатларни кучайтиришда бошқа давлатларга қўшилар экан, Кэмерон можаро зудлик билан тўхтатилиши, Ғазода жангари гуруҳ томонидан гаровга олинган барча шахсларни озод қилиш, ва “энг муҳими, Фаластин халқига сиёсий мақом бериш” кераклигини айтди.

Араб элчилари учун ўтказилган қабулда сўзга чиқар экан, у фаластинликлар “икки давлатни яратиш муаммосининг ечимида ва энг муҳими, Фаластин давлатини яратиш йўлида қайтариб бўлмайдиган ривожланиш бўлишини” кўришлари кераклигини айтди. “Масъулият бизда, чунки биз Фаластин давлати қандай бўлишини белгилашни бошлашимиз керак; у нимани ўз ичига олади; бу қандай ишлайди”, – деди Кэмерон.

“Бу содир бўлишига қараб, биз иттифоқчилар билан Фаластин давлатини тан олиш масаласини, шу жумладан БМТда ҳам кўриб чиқамиз. Бу жараённи қайтариб бўлмайдиган қилишга ёрдам берадиган омиллардан бири бўлиши мумкин”. Араб расмийларининг айтишича, Фаластин давлатининг тан олиниши ўнлаб йиллар давом этаётган Исроил-Фаластин можаросига доимий ечим йўлидаги қадамларни қўллаб-қувватлаш ва босиб олинган Ғарбий Соҳил ва Ғазо секторида бўлажак маъмуриятни мустаҳкамлашда ҳал қилувчи қадам бўлиши керак.