Chanel ва бошқа жаҳон брендлари аста-секин Россия бозорига қайтмоқда

Швейцарияда рўйхатдан ўтган “Шанель САРЛ” компанияси Coco Chanel брендини Россияда рўйхатдан ўтказиш учун ариза топширди, бу ҳақда 11 ноябрь куни хабар берилган. Агар барча ҳуқуқий масалалар ҳал этилса, компания яна ўз маҳсулотларини, жумладан, косметика, парфюмерия, кийим-кечак ва аксессуарларни Россия бозорига таклиф қила олади.

Эслатиб ўтамиз, аввалроқ Франциянинг Chanel модалар уйи Россиядан бутунлай чиқиб кетишга ва ўз бутикларини ёпишга қарор қилган эди.

Бундан ташқари, Италиянинг Trussardi бренди икки йиллик танаффусдан кейин Россия бозорига қайтишини эълон қилди ва буни Европада талабнинг пасайиши билан изоҳлади.

Жанубий Кореянинг Hyundai компанияси ҳам Россиядаги мавжудлигини тиклаш чораларини кўрмоқда ва “Роспатент”га товар белгисини рўйхатдан ўтказиш учун 17 га яқин ариза топширган.

Германиянинг Hugo Boss кийим-кечак бренди Россияда фаолиятини тиклади. Stockmann Россия ритейлери бошқаруви остида Hugo Boss компаниясининг 19 та дўкони очилди. Бренд сақланиб қолди, аммо юридик шахс «Hugo Boss Rus» дан «Link Fashion»га ўзгартирилди.

Франциянинг ҳашаматли бренди Christian Dior “Роспатент”га Dior, Dioramour ва Gem Dior савдо белгиларини, шунингдек, C ва D ҳарфларининг стиллаштирилган тасвири туширилган логотипни рўйхатдан ўтказиш учун ариза топширди. Бу бренднинг Россия бозорига қайтиши мумкинлигидан далолат беради.

Хитойнинг Chery автомобиль ишлаб чиқарувчиси Россияда, эҳтимол Sollers заводида автомобиль ишлаб чиқаришни ташкил этишга тайёрланаётган бўлиши мумкин. Chery Россияда энг кўп сотиладиган учта Хитой брендидан бири бўлиб, у ойига 10 000 дан ортиқ автомобиль сотади.

Американинг PepsiCo компанияси Россияда, Новосибирск яқинида снеклар ва шўр газаклар ишлаб чиқарувчи заводнинг биринчи босқичини ишга туширди. Ишлаб чиқариш қуввати йилига 60 минг тоннани ташкил этади.