Чилонзор туман ИИБ ҳибсга олинган шахснинг ўлими ҳолати бўйича ходимларини текширмоқда

Бош прокуратура Чилонзор тумани ички ишлар бўлими биноси ёнида 21 ёшли йигитнинг ўлими фактини тасдиқлади. Агентлик ёш йигитнинг тўртинчи қават деразасидан қулагани акс этган видеони эълон қилди. Бу ҳақда Kun.uz нашри ёзади.

Бош прокуратура маълумотларига кўра, 22 май куни тергов тадбирларини ўтказиш учун бинонинг 4-қаватига олиб чиқилган ёш йигит жавобгарликдан қочиш мақсадида шу қаватда жойлашган ҳожатхонага кирган. Қайд этилишича, тезкор ходим чалғиган ва ўша пайтда 21 ёшли йигит ҳожатхона деразасидан биринчи қаватда жойлашган ошхонанинг шиферли томига сакраб тушган. Йиқилиш натижасида шифердан ясалган томнинг четини синдириб, боши билан бетон қопламага урилган. Жабрланувчи ИИБ ходимлари томонидан шифохонага етказилган.

“Шу куни, 22 май куни Чилонзор тумани прокурори бошчилигидаги гуруҳ бино ва унинг атрофида бўлиб, тегишли гувоҳлар ва ишда иштирок этган барча ходимлардан кўрсатмалар олди. Кўрсатилган тиббий ёрдамга қарамай, йигит 29 май куни олган тан жароҳатлари туфайли шифохонада вафот этди. Мазкур ҳолат юзасидан суд-тиббий экспертизаси тайинланди”, — дейилади Бош прокуратура хабарида.

Ички ишлар органлари ходимларининг ҳаракатларини баҳолаш учун хизмат текшируви ўтказилади.