Чилонзор туманида “Смарт-сити” қурилиши ва яна 50 та йирик лойиҳани амалга ошириш режалаштирилмоқда

Шавкат Мирзиёев Тошкент шаҳрининг Чилонзор туманини ривожлантириш чора-тадбирларини тасдиқлади. Ҳужжат билан ҳудуднинг саноат имкониятлари ва инвестицион жозибадорлигини ошириш бўйича “Йўл харитаси” тасдиқланди. Хусусан, унда пойтахт чеккасида 320 гектар ер майдонида саноат зонасини ташкил этиш чора-тадбирлари белгиланган. Бу ҳақда Spot.uz ёзади.

Харита маҳаллий инфратузилмани ривожлантириш босқичларини ўз ичига олган. Масалан, «Рубоий» ва «Чилонзор» кичик станцияларида аҳолини электр энергияси билан барқарор таъминлаш ва янги инвестиция лойиҳаларини амалга ошириш мақсадида мос равишда 40 МВт ва 25 МВт қувватга эга янги трансформаторларни ўрнатиш режалаштирилган.

Бўрижар канали қирғоқларида 40 миллиард сўмлик ободонлаштириш ишлари режалаштирилган. Бу ҳудудларда умумий овқатланиш шохобчалари, савдо, дам олиш масканлари, спорт майдончалари жойлашган гастрономик-истироҳат боғли кўча очилади.

Анҳор (17 млрд. сўм) ва Қонқус (28 млрд. сўм) каналлари қирғоқлари ҳам ободонлаштирилади. Умумий майдони камида 10 гектар бўлган бўш ерларда кичик боғлар ва майдонлар яратиш режалаштирилган.

Бундан ташқари, туманда 2025 йил охиригача амалга оширилиши режалаштирилган инвестиция лойиҳаларининг манзилли рўйхати белгиланган. Уларнинг умумий қиймати 4,49 триллион сўмга баҳоланмоқда.

• Масалан, рўйхатдан маълум бўлишича, World Maral компанияси туманда 2,3 триллион сўмга “Ақлли шаҳар” мажмуасини қурмоқчи. Унинг таркибига савдо маркази, бизнес-марказ, IT-марказ, меҳмонхона ва тураржой мажмуаси киради.
• Рўйхатга умумий қиймати 1,04 триллион сўмлик 1485 та квартирани топширишни назарда тутувчи 12 та уй-жой қурилиши лойиҳаси киритилган.
• Шунингдек, 7 та меҳмонхона (яна яна биттасини кенгайтириш), 7 та бизнес марказ, 2 та хусусий клиника, битта коворкинг маркази ва хусусий болалар боғчасини ҳам қуриш режалаштирилган.
• Саноат соҳасида металл профиллар, вентиляция тизимлари, офис мебеллари, арқонлар, шунингдек, озиқ-овқат маҳсулотлари ишлаб чиқаришни йўлга қўйиш режалаштирилган.