Европа Иттифоқи рақобатбардошликни тиклашга қарор қилди

8-ноябрь куни Будапештда бўлиб ўтган норасмий Европа Иттифоқи саммити жаҳон бозоридаги рақобатбардошликни тиклашга қаратилди. Саммит давомида АҚШда Доналд Трампнинг ғалабаси ва Германияда ҳукмрон коалициянинг парчаланганидан сўнг Европа Иттифоқининг иқтисодий позициясини мустаҳкамлаш масалалари муҳокама қилинди. Саммитда Европанинг мудофаа қобилиятини мустаҳкамлаш ва АҚШдан мустақил бўлиш нуқтаи назаридан Украина мавзуси ҳам ёритилди.

Европа Иттифоқининг бош дипломати Хосеп Боррел, ўзининг “Европа учун омон қолиш рецепти” ни тақдим этди. Унинг фикрига кўра, Европа кучлироқ ва суверен бўлиб, глобал муаммоларга қарши туриш учун ўз хавфсизлигини бошқаларга ишонмасдан, бирлашиши керак. Боррел, шунингдек, Украина олдидаги мажбуриятларни бажаришда давом этиш зарурлигини таъкидлади.

Европа Кенгаши раҳбари Чарлз Мишел ҳам Украина бўйича қўллаб-қувватлашнинг давом этишини урғулади. У, агар Европа Иттифоқи Украинани қўллаб-қувватлашни тўхтатса, бу Путин ва бошқа авторитар режимлар учун хато сигнал бўлишини айтиб ўтди. Еврокомиссия раҳбари Урсула фон дер Леен эса Европа Иттифоқининг иқтисодий ўсиш ва рақобатбардошликни тиклаш учун янги стратегиялар ишлаб чиқилишини эълон қилди. Бу стратегия, молия бозорлари, энергетика ва телекоммуникация тармоқларини яхшилашни кўзда тутади.

Саммитда Виктор Орбан, Европа Иттифоқининг ягона ва кучли бўлиши зарурлигини таъкидлади. У, шунингдек, Европани яна буюк қилиш учун бирлашиш кераклигини таъкидлади.

Европа Иттифоқи, Трампнинг ғалабаси ва Хитой билан бўлган рақобатни ҳисобга олиб, ўз иқтисодий ҳолатини қайта кўриб чиқмоқда ва келгуси йилларда иқтисодий ислоҳотларни амалга ошириш зарурлигини англамоқда.