Европанинг сирли ер ости туннел тармоғини билармидингиз

Европада, ер остида, 12 минг йиллик тарихга эга улкан туннел тармоғи жойлашган бўлиб, у Шотландия тоғларидан то Ўрта ер денгизи қирғоқларигача минглаб километрга чўзилган. Аммо бу тармоқнинг асл мақсади ва келиб чиқиши ҳануз сир бўлиб қолмоқда. Ушбу мавзу бўйича «Арчеологй Wорлдс» нашри маълумот берди.

Мутахассисларнинг фикрича, туннел тармоғи қадимда одамларни йиртқич ҳайвонлардан ёки табиий офатлардан ҳимоя қилиш учун ёки турли ҳудудлар ўртасида хавфсиз йўлак яратиш мақсадида қурилган. Баъзи назарияларга кўра, бу алоқалар диний ёки рамзий аҳамиятга эга бўлиб, улар «оламлар ўртасидаги кўприк» вазифасини бажарган.

Немис археологи доктор Хайнрих Куш бу тармоқни атрофлича ўрганиб, «Ер ости дарвозаларининг сирли ҳикоялари» номли китобини нашр қилди. Унинг сўзларига кўра, туннелнинг баъзи қисмлари Баварияда 700 метр, Австрияда 350 метр узунликда аниқланган. Туннелнинг кенглиги ўртача 70 см бўлиб, одам улардан фақат ўтиб кетиши учун етарли. Айрим жойлар эса дам олиш ёки омборхона вазифасини бажарган хоналарга кенгайган.

Туннел кириш жойларининг кўпларида кейинчалик черковлар қурилган. Доктор Кушнинг фикрича, бу католицизм даврида эски диний эътиқодларни йўқ қилишга қаратилган бўлиши мумкин.

Шу билан бирга, бу каби туннел тармоқлари фақат Европада эмас, балки Америка ва бошқа қитъаларда ҳам учрайди. Кўплаб афсоналарга кўра, қадимий одамлар офат пайтида ана шундай ер ости иншоотларига бошпана сифатида жойлашган.

Сирли туннел тармоғи ҳануз илмий мунозараларга сабаб бўлмоқда. Унинг асл мақсади ва тарихини англаш келажакдаги кўплаб тадқиқотларни талаб қилади.