Франция президенти Ўзбекистонга ташриф буюради

Франция президенти Эммануэль Макрон 1 ва 2 ноябрь кунлари Қозоғистон ва Ўзбекистонга расмий ташриф билан келади. Ташриф дастуридан иқтисодий ҳамкорлик, энергетика, транспорт инфратузилмаси, шунингдек, сув ресурсларини бошқариш ва озиқ-овқат хавфсизлиги масалаларини муҳокама қилиш ўрин олган, деб ёзади “Газета” нашри Елисей саройининг расмий коммюникесига таянган ҳолда.

Франция икки давлатнинг ислоҳотлар борасидаги саъй-ҳаракатларини қўллаб-қувватлайди, ҳамкорликни диверсификация қилишга ёрдам беради, уларнинг мустақиллиги ва суверенитетини, шунингдек, Европа билан алоқаларни мустаҳкамлаш истагини қўллаб-қувватлайди, дея таъкидлади Макрон маъмурияти.

Ташрифлар давомида Франция компаниялари иштирокидаги иқтисодий форумлар ўтказилиши режалаштирилган. Франция, шунингдек, жиддий глобал муаммолар, жумладан, экологик муаммолар, айниқса, сув ресурсларини бошқариш ва озиқ-овқат хавфсизлиги нуқтаи назаридан минтақа давлатлари билан ҳамкорлик қилади. Хавфсизлик нуқтаи назаридан Франция Ўзбекистон ва Қозоғистон билан ҳамкорликда террорчилик таҳдиди ва наркотик моддалар савдосига қарши иш олиб бормоқда.