Сохта ҳавола орқали фуқароларнинг маблағларини ўзлаштирган йигит қўлга тушди

Тошкент шаҳри, Шайхонтоҳур туманида яшовчи 39 ёшли Б.Р. ИИОга мурожаат қилиб, банк картасидан 11.719.000 сўм миқдоридаги пул маблағлари номаълум шахс томонидан ўзлаштирилганлигини маълум қилган.

Тезкор-қидирув тадбирлари натижасида, мазкур жиноятни Фарғона вилояти, Ўзбекистон туманида яшовчи 20 ёшли Х.З. содир этганлиги аниқланган.

«Тергов органларига жалб этилган Х.З. Интернет фойдаланувчиларига телеграм мессенжери орқали турли хил мазмунидаги хабарни (ҳавола) жўнатиб, банк карта маълумотларини қўлга киритган ва уларнинг банк карталарида сақланган пулларни ўғирлаб, қинғир йўллар билан бойлик орттириб келаётганлиги маълум бўлди», – дейилади хабарда.

Мазкур ҳолат юзасидан Х.З.га нисбатан Жиноят кодексининг 169-моддаси 3-қисми билан жиноят иши қўзғатилди.

Жиноят кодексининг 169-моддаси 3-қисмидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.