Германия қурол экспорти 2023-йил рекордини янгилаши мумкин

2024-йилнинг 1-январидан 15-октябригача Германия ҳукумати 10,9 миллиард евро қийматидаги қурол ва ҳарбий техника экспортига 4163 та рухсатнома берган. Бу кўрсаткич ўтган йилги 12,2 миллиард евролик рекордга яқинлашмоқда ва йил охиригача уни ошиб кетиши кутилмоқда.

Экспортнинг катта қисми, 7,2 миллиард евро, қурол-яроғ етказиб беришга тўғри келмоқда. Асосий сабаб Украина учун ҳарбий ёрдамнинг ортишидир. Украина учинчи йилдирки, Россия босқинига қарши турмоқда.

Бунда депутат Севим Дагделен Германия қурол экспортининг кенгайишини танқид қилиб, Украинага ҳарбий ёрдамни тўхтатишни ва Россия президенти Владимир Путин билан музокараларни бошлашни талаб қилди.

Германия экспортининг асосий йўналишлари орасида Украина, Сингапур, Ҳиндистон, Қатар ва Саудияга қурол етказиб бериш мавжуд. Саудияга экспорт аввалроқ Яман уруши ва журналист Жамол Қашогги қотиллиги сабабли чекланган эди, аммо кейинчалик бу чекловлар юмшатилди.