Хитой банклари Америка санкциялари таҳдиди остида Россия учун чекловлар жорий этмоқда

Хитойнинг камида иккита давлат банки Россиядан келган мижозлар билан молиявий муносабатларни қайта кўриб чиқишни бошлади, деб ёзади Bloomberg бозор манбаларига таяниб.

Агентлик маълумотларига кўра, молия институтлари энди трансчегаравий операцияларни янада қаттиқроқ кузатиб боради ва санкция рўйхатидаги мижозлар, шунингдек, Россия мудофаа саноати иштирокчилари билан алоқаларни узиш ниятида.

Хитойлик кредиторлар, шунингдек, Россия Федерациясидан келган мижозларга нисбатан ўзларининг тегишли текширувларини кучайтиради: хусусан, улар ўз корхоналари ва якуний бенефициарлари Россияда рўйхатдан ўтганлигини текширади, дея қўшимча қилади Bloomberg.

Кремль бу “стратегик шерик” билан муносабатларга таъсир қилмаслигини айтди. “Сиз Кремль молиявий операциялар билан шуғулланмаслигини биласиз”, – деди президент матбуот котиби Дмитрий Песков янги чекловлар ҳақида. Унинг қўшимча қилишича, Хитой билан савдо-иқтисодий ҳамкорлик ҳажми “200 миллиард долларлик чегарадан ошиб кетган ва ўсишда давом этмоқда”.

Декабрь ойи охирида АҚШ президенти Жо Байден АҚШ ғазначилигига Россия ҳарбий-саноат мажмуаси билан боғлиқ операцияларни осонлаштирадиган хорижий банкларга нисбатан чекловлар жорий этишга рухсат берувчи фармонни имзолади.

Ушбу тақиқни бузган молия ташкилотлари АҚШда вакиллик корреспондентлик ҳисобларини очолмайди, уларнинг мулки блокланади.

Аввалроқ Қўшма Штатлар Шимолий Корея ракеталарини Россия ҳарбийларига тақдим этишига жавобан санкциялар киритган эди.