Қирғизистонда оммавий тартибсизликлар бўйича ТикТокер ҳибсга олинди

Қирғизистонда 1985 йилда туғилган фуқаро ўзининг ТикТокдаги контенти юзасидан қўлга олинди. Унинг уйида тинтув ўтказилган ва ҳозирда гумонланувчи вақтинчалик сақлаш изоляторига олинди, деб хабар бермоқда Кактус.медиа Чуй вилояти ИИБ матбуот хизматига таяниб.

Департамент матбуот хизмати вакилларининг сўзларига кўра, бу шахс “мухолифат ва фуқароларни амалдаги ҳукуматга қарши митинглар ва тартибсизликларда қатнашиш учун бирлашишга ундаган”.

Суд-лингвистик экспертиза унинг видеоларида давлат тўнтаришига “чақирув аломатлари”ни топган. Хавфсизлик кучлари оммавий тартибсизликлар моддаси бўйича жиноий иш қўзғатди. Тинтувдан сўнг эркакнинг ноутбуки ва мобил телефонини мусодара қилинган.

Ижтимоий тармоқлар Қирғизистон фуқароларининг жиноий жавобгарликка тортилишига сабаб бўлаётгани биринчи марта эмас. 2023 йилнинг декабрида Миллий хавфсизлик давлат қўмитаси (МДҚ) бишкеклик фуқарони давлатга хиёнатда айблаб, сентябрь ойида ҳибсга олинган мухолифатчи Адахон Мадумаровни қўллаб-қувватлаш митингига чиқиш чақириғи туфайли ҳибсга олганди.

Қирғизистондаги оммавий норозилик намойишлари охирги марта 2020 йилда, парламент сайловларидан кейин бошланган намойишлар ҳукумат алмашинувига олиб келган эди. Миллий хавфсизлик давлат қўмитасининг амалдаги раҳбари Қамчибек Ташиев сиёсатчи Садир Жапаровни озод қилган бир гуруҳ намойишчиларни бошқарган. Шундан сўнг Жапаров ўзини муваққат президент деб эълон қилди ва 2021 йилда бўлиб ўтган фавқулодда президентлик сайловларидан сўнг мамлакатни бошқаришни бошлади.