Эроннинг Кермон шаҳрида содир этилган теракт учун жавобгарликни ИШИД гуруҳи ўз зиммасига олди

Пайшанба куни «Исломий давлат» гуруҳи Эронда 2020 йилда Ироқда АҚШ дрони ёрдамида ўлдирилган қўмондон Қосим Сулаймоний хотирасига бағишланган ёдгорлик мажмуасида 100 га яқин одамнинг ҳаётига зомин бўлган ва ўнлаб одамларни яралаган икки портлаш учун жавобгарликни ўз зиммасига олди. Бу ҳақда Reuters агентлиги ёзади.

Жангари сунний мусулмонлар гуруҳи ўзига алоқадор Телеграм каналларда эълон қилган баёнотларида, ИШИДнинг икки аъзоси чоршанба куни Эроннинг жануби-шарқидаги Кермон шаҳридаги қабристонда Сулаймоний вафоти муносабати билан йиғилган оломон орасида портловчи камарни портлатганини айтади.

Аввалроқ Теҳрон портлашларда «террорчиларни» айблаб, 1979 йилги Ислом инқилобидан кейинги энг қонли ҳужумлар учун қасос олишга ваъда берган эди. Икки портлашда 284 киши, жумладан, аёллар ва болалар ҳам жароҳатланган.

“Улар Сулаймоний аскарлари томонидан жуда кучли жавоб зарбасига дуч келишади”, деди Кермонда Эроннинг биринчи вице-президенти Муҳаммад Мохбер журналистларга.

​ IRNA давлат ахборот агентлигига исмини ошкор қилмаган манбанинг айтишича, Сулаймонийнинг она шаҳри Кермондаги қабристонда биринчи портлаш “худкуш террорчи томонидан содир этилган”.

«Иккинчи портлашнинг сабаби катта эҳтимол билан бир хил», – дейди IRNA манбаси.

БМТ Хавфсизлик Кенгаши ўз баёнотида Кермондаги “қўрқоқ террорчилик ҳужуми”ни қоралаб, қурбонларнинг оила аъзолари ва Эрон ҳукуматига ҳамдардлик билдирди.

Эрон президенти Иброҳим Раисий чоршанба кунги “жирканч ва ғайриинсоний жиноят”ни қоралади. Эрон олий раҳбари Оятуллоҳ Хумайний портлашлар учун ўч олишга ваъда берди.